Forum d´Avignon, kulturearen ganeko eztabaida foroa martxan da Bilbon

Forum D´Avignon Bilbao eztabaida foro ospetsua AlhóndigaBilbaon hasi zan bart kultura arloko hainbat aditu bertan zirala eta domekan, hilaren 8an amaituko da. Raw, esperientziak konpartiduteko lan-jardunaldian, Forumaren aurreko ekitaldian, adituek Uria, kultur ekosistema legez aztertu eben. Danetara, bilboko kulturearen inguruko 65 lagunek tokiko ekosistema kulturalari buruz eztabaidatu eta hobekuntza-proposamenak aurkeztu zituen bart.

Munduko herrialde desbardinetatik etorritako 400 personek egin dabe izen-emotea eta azpimarratzekoa da Forum d´Avignoneko edizino honetako parte-hartzaileen izaera heterogeneoa. Izena emon dabenen artean aitatzekoak dira: enpresen zuzendariak, erakunde desbardinetako funtzino publikoko arduradunak, bai nazionalak zein tokikoak, kulturearen profesionalak, ikasleak, ikertzaileak, artistak, arkitektoak, urigileak eta arte eta sortzailetzearen zuzendariak.

Topaketa honek (Bilbao Metrópoli 30ak emondako bultzadeari esker egin dana) ekosistema kulturaleko diagnostiko bat egitea eta hobekuntza- proposamenak egitea dau helburu.

Bilboko Forum D’Avignon

Bilbao kultur ekosistemea da, eta, egunero, uritar eta bisitarientzat topaketa eta dinamika aberasgarriak sortzen dira bertan. Ekonomia eta urigunea eraldatu ziranetik, uriaren izena bikaintasuna, ekonomia-jarduera, ezagutza, artea, teknologia, diseinua edota sorkuntzea lako kontzeptuakaz lotzen da.

Forum d´Avignonek kultureak ekonomia-garapena eta herritarren ongizate orokorra sustatzen lagunduko dau; barrikuntza eta sorkuntza maila handitzen dau, eta erabagigarria izaten da erakargarritasunari eta konpetentzia globalari aurre egiteko orduan.

Parte-hartzaileen artean aditu asko izango dira, besteak beste, Katrin Jakobsdottir Islandiako Hezkuntza, Zientzia eta Kultura ministro ohia, Saskia Sassen soziologoa eta Gizarte Zientzien Asturiasko Printzea Saria 2013, VitoAcconci artista eta arkitektoa, Gail Lord Chicagoko (AEB) Kultura Programako arduraduna, Tarek Cherkaoui Qatarreko Museoen Arduraduna, Guadalupe Echevarria Donostia/San Sebastián 2016 Kulturaren Uriburu Europarraren kultur zuzendaria, Javier Gomá saiogilea eta Juan March Fundazinoko zuzendaria, Joxean Muñoz Eusko Jaurlaritzako Kultura saileko sailburuordea, Txomin Badiola artistea eta Alfonso Santiago Last Toureko zuzendaria.

Zenbait praktika positibo abiapuntutzat hartuta, uri bat baliabiderik anitzenak aprobetxetan dituan kultur ingurune bihurtzeko dagozan erak aztertu ahal izango dira batzorde honetan. Konparazino prozesu horren bitartez, sormenak ikuspegiak hibridetan lagundu leikela ikusiko da, bai artistena zein uri-planifikatzaileena. Egunotan Bilbok dituan kulturearen inguruko ardurak be landuko ditue Forumean parte hartuko daben adituek.

Egitarau osoa hemen.

Catalyse proiektua

Bilboko Forum d´Avignon Catalyse izeneko europar programa kultural baten barruan dago. Bertan Essen (Alemania), Bilbo eta Avignon uriak parte hartzen dabe. Catalyse proiektua Forum d´Avignonen oinarritzen da eta kultur mailan uriek sortzen dituen ekarpenetan lan egitea dau helburu.

Essen uriaren kasuan, Kulturea giltza da izan zan gaia eta 2013ko bagilaren 27 eta 28an izan zan. Avignonen egin zan foroa, barriz, zemendiaren 21ean eta 23an, Kulturen botereak gaia izan eban ardatz.

Forum D’Avignon

2008an hasi zanetik, Forum d´Avignonek kultura eta ekonomiaren arteko loturak lantzea izan dau helburu, baita uritarrengan dauen eragina azpimarratzea be. Forumak nazinoartean 25 estudio eta proposamen ditu eta Gallimard edizinoetan frantsezez eta ingelesez argitaratutako aktak. Gainera, artista, sortzaile, enpresari, aditu, nazinoarteko konsultari eta 25 bazkide publiko eta pribatuen etenbako mobilizazizoa dauka.

Forum d´Avignon laborategiak hiru gai nagusi landuko ditu: Finantzaketea, kulturearen eta industria sortzailearen eredu ekonomikoak, mundu digital eta barritzailea, eta azkenik, kultureak ekonomiaren garapenean dauen eragina.

Ikusi argazki guztiak handiago