Fant 2014, Bilboko Zinema Fantastikoko jaialdiak trailer faltsuen lehieketea deitu dau

| Ikusi handiago | Argazki originala

Bilboko Udaleko Kultura eta Hezkuntza Sailak antolatutako Bilboko XX. Zinema Fantastikoko jaialdia 2014ko maiatzaren 9tik 16ra egingo da eta hogeigarren urteurren hori ospatzeko ekitaldien artean, Zinemaldiak Trailer Faltsuen Lehiaketea deitu dau. Ikus-entzuleak izango dira aurkeztutako proposamen onenen artean lehen eta bigarren saria emongo dabenak.

Helburua, 2014ko maiatzaren 16a (Zinemaldia amaituko dan eguna) baino lehen existiduten ez dan fantasiazko edo bildurrezko film baten trailer faltsua egitea da. Parte hartzeko interesa daben lagunek Movibeta plataformearen bitartez bialdu beharko ditue euren trailer faltsuak. Parte-hartzaile bakotxak nahi beste proposamen aurkeztu ahal izango ditu (bakotxa bere aldetik), eta norbanakoek zein taldean egindakoak izan daitekez.

Bideo guztiek trailer formatua izan beharko dabe, eta ezin izango dabe 3 minutu baino gehiago iraun, kredituak barne. Ezaugarri teknikoei jagokenez, proposamenek ondoko ezaugarriak bete beharko ditue: 16:9 etxurea, 1920x1080 irudi kalidadea eta H264 formatua.

Aurkeztutako trailer faltsuak, edo, bestela, horreen aukeraketa bat, Programazio Batzordeak egindakoa, Fant 2014ko saio batean emongo dira, eta saioaren amaieran ikus-entzuleek onena zein dan bozkatuko dabe. Boto gehien jasoten dituen trailer faltsuaren zuzendariak eta talde egileak 1.500 euroko saria jasoko dau, eta bigarren lekuan geratzen dan trailerraren zuzendariak eta talde egileak 750 euro jasoko ditu.

EleFANTearen oroimena

Bilboko Zinemaldi Fantastikoaren XX. urteurrenaren ospakizunakaz jarraituz, Bilboko Udaleko Kultura eta Hezkuntza Sailak EleFANTearen oroimena ekimena jarri dau martxan. Holan, Fant: 20 urte egin doguz zu lako personei esker! Aurtengo jaialdirako txartel bat lortu nahi dozu? lelopean, konbita egiten jake Zinemaldiaren adiskideei, aurreko 19 edizinoetan jasotako esperientziak edo/eta oroitzapenak konpartidu deiezan. Horretarako, minutu bat baino gitxiago iraungo dauen bideo batean grabau beharko dabe euren burua, Zinemaldiaren oroitzapenak, anekdotak edo momentu ahaztezinak kontatuz, Youtubera igon eta esteka memoriadeelefante@fantbilbao.net helbidera bialdu beharko dabe. Bertatik sare sozialetara eta Fanteko webgunera zabalduko da. Lanak jasoteko epea maiatzaren 7an amaituko da, Bilboko XX. Zinema Fantastikoko jaialdiaren bezperetan. Jasotako proposamen guztien artean, Jaialdi osorako 5 txartel bikotx zozketatuko dira.

Zinemaldiko oroitzapenak konpartidu dituan lehenengoa Borja Crespo idazle, marrazkilari zinemagile bilbotarra izan da. Urte batzuetan zinemaldi honetako programazino koordinatzaile be izan zan. Bere bideoa Fant jaialdiaren webgunean eta sare sozialetan dago honezkero.

XX. Fant zinemaldiak erreferentziazko sariakaz jarraituko dau

2013ko abendutik zabalik dago XX. edizinorako filmak aurkezteko epea. Zinemaldiaren antolatzailea dan Bilboko Udaleko Kultura eta Hezkuntza Sailak aurrera jarraituko dau film laburrentzako sariakaz: film labur onenaren saria –epaimahaiaren eta zinemaldiko ikus-entzuleen eretxiz–, bakotxa 3.000 euroko sariagaz, eta epaimahaiak emongo dauen euskal film labur onenaren saria, 2.000 euro jasoko dauena.

Sari horreez gan, Zinemaldiko aurtengo edizinoak erreferentziazko sariakaz be jarraituko dau: Sekzino Ofizialeko fantasiazko generoko Film Luze Onenaren Saria, filmaren egileari emongo jakona, eta azken urteetan genero fantastikoan gorako bidea erakutsi dauen personeari emongo jakon Fantrobia Saria. Horrez gain, aurten ere beste bi sari egongo dira Sekzio Ofizialeko film luzeentzat: Euskal Herriko Gidoilarien Alkarteak emongo dauen Gidoi Onenaren Saria, eta Fas Zine Klubak emongo dauen Zuzendaritza barritzaileenarentzako Saria.

Film laburren eta luzeen kopiak jasoteko azken eguna 2014ko martiaren 15a izango da. Informazino gehiago eta oinarri osoak www.fantbilbao.net web gunean.