Fant zine fantastikoaren Bilboko jaialdiak 2014ko edizinoan filmak aurkezteko epea zabaldu dau

| Ikusi handiago | Argazki originala

Bilboko Udaleko Kultura eta Hezkuntza Sailak 20. Fant zinemaldi fantastikoaren lehiaketan parte hartu nahi daben filmak aurkezteko epea zabaldu dau, eta kopiak aurkezteko azken eguna 2014ko martiaren 15a izango da. Fant jaialdiaren 20. edizinoa datorren urteko maiatzaren 9tik 16ra bitartean izango da.

Edizino honetan, epaimahaiaren eta ikusleen eretxiz onenak izan diran film laburrei emoten jakezan 3.000 euroko bi sariak eta epaimahaiaren eretxiz Euskal Herriko film labur onenari emoten jakon 2.000 euroko sariagaz jarraituko da.

Antolatzaileek adierazo dabenez, hiru sari horreek ezin dira banatu barik geratu, eta Bilboko Udaleko Kultura eta Hezkuntza Sailak zinemagile gazteen lanari laguntzeko egiten dauen lana indartzea dabe helburu, hori baita, aldi berean, Fant zinemaldiaren nortasun ikurretako bat.

Sariak erdibana jasoko ditue filmen produktoreak eta egileak, eta produktorea eta zuzendaria persona bera badira, sariaren kopuru osoa emongo jako.

Aitatutako sari horreez gan, Fant jaialdiaren hurrengo edizinoak bere erreferentziazko sariakaz jarraituko dau: Sail Ofizialeko genero fantastikoko film luze onenari emoten jakon saria filmaren egileari emongo jako, eta Fantrobia saria, azken urteetan zinema fantastikoaren barruan hazten dagoan personeari edo erakundeari emongo jakona.

Sari horreei beste bi gehituko jakez, Sail Ofizialeko film luzeei emongo jakezanak: gidoi onenari emoten jakon saria, Euskal Herriko Gidoilarien Elkarteak emoten dauena, eta zuzendaritza barritzaileenari emoten jakon saria, FAS zine klubak emongo dauena.

Nontzefilmak

Nontzeberri kultur atariak, Fant jaialdiagaz alkarlanean, Nontzefilmak On Line Zinema eta Animazinozko Film Laburren Lehiaketea antolatu dau. Lanak bialtzeko epea (www.nontzefilmak.com webgunearen bidez) 2014ko martiaren 28an amaituko da. Aurtengo edizinoan barrikuntzak dagoz sari horeietan, sarien kopurua gitxitu baina sari bakotxaren zenbatekoak gora egin dauelako.

Film onenari emoten jakon Nontzefilmak Saria 1.500 eurokoa izango da, animazinozko film onenari emoten jakona bezela. Euskeraz egindako film onenari emoten jakon saria, barriz, 2.000 eurokoa izango da.

Azkenik, 2014ko maiatzaren 10ean Nontzefilmak Gaua izango da Fant jaialdiaren barruan, eta bertan, jasotako lanik onenak proiektauko dira, hainbat ezustekogaz batera.