'Ernest & Celestine' animazinozko pelikulea estreinauko dabe barikuan

| Ikusi handiago | Argazki originala

Benjamin Renner, Vincent Patar eta Stephane Aubierek zuzendutako Ernest & Celestine animazinozko film frantsesa euskeraz estreinauko da barikuan, abenduaren 20an. Zineuskadi alkarteak sortutako Zinema Euskaraz programearen ekimena da.

Gabrielle Vincent idazlearen eleberria dau oinarri pelikuleak. Lau urteko lanaren emoitzea da barikutik aurrera ikusgai egongo dana. Ikusle handi zein txikiak bereganatu dituen alegia zirraragarria dala dinoe Zinema Euskarazeko arduradunek.

Ernest hartzaren eta Celestine sagutxuaren istorioa kontetan dau pelikuleak. Ernest basoan bizi dan hartz handia da, musikaria lanbidez. Neguko lozorro luzetik izartu danean, gosekilik doa urirantz, tripea betetako zeozeren bila. Musikeak ez deutso jateko emoten, eta sastarretan begiratu beharra dauka. Eta horretan dabilela ezagutzen dau Celestine sagutxua.

Ernestek eta Celestinek alkarren laguntzinoa behar dabe euren bizimodua aldatzeko. Hartzak goian eta saguak behean bizi diran gizarte zorrotz eta zurrunean, laguntxu biek hainbat arau apurtuko ditue eta inguru osoa hankaz gora ipiniko dabe euren laguntasunari eusteko.

Ernest & Celestine-k hainbat sari irabazi ditu, besteak beste, Satellite Awards, Cesar Sariak eta Cannesko Jaialdian izentapen berezia. Pelikulearen zatitxu bat ikusi gura izan ezkero, hemen.

Urtea amaitu orduko, eta 2014ko hasierarako, Zineuskadi alkarteak beste hainbat film eta dokumental euskeratzea aurreikusi dau Zinema Euskaraz programearen barruan. Halanda ze, Walking With Dinosaurs, Fidgety Bram, Aproved for Adoption edo Emperor lanak laster egongo dira aretoetan ikusgai.