Ikuslearen begiak aurkeztuko dau Donostiako 61. Zinemaldia

Bizkaie! 2013-05-13 11:10   Barriak

Atzeko aldea baltzizko, erdian, ikuslearen begiaren antza daukan kolorezko kurba zentrokidedun zirkuluz osotutako irudia. Kartel horrek iragarriko dau Donostiako 61. Zinemaldia, irailaren 20tik 28ra bitartean. Toni Ponti diseinatzaile eta argazkilari katalanaren sorkuntzea da Optico izenburuko kartela.

Donostiako Eureka! Zientzia Museoan aurkeztu dabe kartel irabazlea. Jose Luis Rebordinos Zinemaldiko zuzendariak Sail Ofizial, Zuzendari Barriak, Zabaltegi, Horizontes Latinos eta Perlak sailetarako aukeratutako irudiak erakutsi zituan. Mundu osoko diseinatzaileek hartu dabe parte lehiaketan; danetara, 327 egileren 1.046 proposamen jaso dira.

Toni Ponti egileak berak kartelaren azaldu ebanez, atzera begira ipini eta aurreko mendeko 60ko hamarkadako ikutu freskoa, koloristea, aurreretxi bakoa eta pop kutsukoa emongo deutso bere kartelak Zinemaldiari. Urte garrantzitsuak izan ziran hareek. Zinemea eta diseinu grafikoa buztartu ziran, kredituetako tituluek hartu eben protagonismoari esker, azaldu eban.

Zuzendari Barriak kategorian, Berriak izeneko kartela izango da irudia, Lander Telletxea Bilbon bizi dan ilustratzaile eta diseinatzaile grafikoak egindakoa. Egilearen eretxiz, bere kartela eztanda bat da, oihu bat, borborrean dagoan tag zuzen bat.

Horizontes Latinos atalari jagokonez, Oliver Meneses diseinatzaile mexikarraren Ciudad kartela izan da irabazlea, eta Perlak kategorian, Madrilen bizi dan eta 3D diseinuan eta infografietan espezializautako Beatriz Galvan de la Rosa arkitekto teknikoaren Gota a gota kartela aukeratu dabe.

Zabaltegi kategorian, Sin Límites kartela izan da onena, Trystupidthings arte- eta diseinu-estudioaren sortzaile Maialen Echaniz diseinatzaile donostiarraren lana.

Oraintsu aurkeztutako abentura- eta akzino-kirolei eskainitako Savage Cinema sail barriaren kartela Pensando en Blanco estudioko Borja Garmendiak egin dau.

Ikusi argazki guztiak handiago