Franck Khalfoun zinemagile frantsesaren 'Maniac' 19. Fant jaialdiko sari nagusi

Bizkaie! 2013-05-10 15:17   Barriak

Koldo Serra zinema zuzendariak, Maru Valdivieso antzezleak eta David Martos kazetari eta kritikariak osotutako epaimahaiak Franck Khalfoun zinemagile frantsesaren Maniac film luzeari emon deutso 19. Fant Bilboko Zinema Fantastikoko Jaialdiko sari nagusia. Sari-emotea iluntzean egingo dabe, Bilboko BBK Salan, 19:45ean.

Ikus-entzuleak hiltzailearen buruan modu bitxian sartzeagatik eta bildurrezko zinemearen erreferentzia klasikoa barriro asmatzeko erakutsi dauen gaitasunagaitik saritui dau epaimahaiak Khalfounen lana. Elijah Wood protagonista dauen 1980ko izen bereko filmearen remake hau laster ailegauko da zinema-aretoetara. Gidoia Alexandre Ajarena eta Gregory Levasseurrena da.

Film laburren atalean, epaimahaiak Film Labur Onenaren Saria ex aequo emon deutsie José Luis Alemánen Hotel eta Koldo Almandozen Deus et machina lanei. Alemanen pelikuleak arte zuzendaritza barritzailearen bitartez, eta alkarrizketa barik, giro zapaltzailea sortzeko gaitasuna daukala nabarmendu dabe epaimahaikideek prentsaurrekoan. Deus et machina beharrak, barriz, metafora xumearen eta bitxiaren bitartez, Jainkoa bera be, akaso, korporazinoen poderearen esku egon daitekeela adierazoteko daukan gaitasuna balorau dabe.

Euskal Film Labur onena Alberto Vázquezen Sangre de unicornio izan da. Fant jaialdiko ikusleek Tal Shamirren eta Diego Modinoren Efímera lana aukeratu dabe Film Labur Onena.

Arrastian egingo dabe sari-emotea, Bilboko BBK Salan. Horrezaz gan, Aura Garrido Fantrobia saria jasoko dau, eta Pablo Bergerrek, Fant Ohorezko Saria. Amaitzeko, Kristina Buozyteren Vanishing waves lana proiektauko dabe.

Pablo Berger zuzendaria, Ohorezko Saria

Pablo Berger zinemagile bilbotarrak lortutako nazinoarteko ospea aintzatetsi gura dau Fant Ohorezko Sariak. 2009an, zinemaldiko epaimahaikide izan zan.

Orain 25 urte egin eban lehenengo pelikulea, Mamá (1988). Álex de la Iglesiak egin eban arte zuzendaritzea, eta Torrebrunok eta Ramón Bareak be parte hartu eben. Blancanieves film luzeagaz arrakasta nabarmena lortu dau Bergerrek, 10 Goya sari lortu zituan, tartean, film onenari eta jatorrizko gidoi onenari sariak.

Aura Garrido, Fantrobia Saria

Fantasiazko generoan gero eta indar gehiago dauen persona edo taldea saritzen dau Fantrobiak. Aura Garrido aktore madrildarrak jasoko dau saria aurten. 23 urte baino ez dituan arren, ibilbide oparoa dauka telebistan eta zineman. Sei film luzetan hartu dau parte, barriena Oriol Pauloren “El cuerpo” da, egunota zinema-aretoetan ikusgai dagoena.

Goya sarietarako izentauta egon zan 2011n, Aktore Barri Onena atalean, Planes para mañana pelikuleagaitik. Laster estreinauko ditu lan barri bi, biak zinema fantastikoaren arlokoak, Stockholm eta Viral.

Ikusi argazki guztiak handiago