Zortzi film labur ikusgai, Laburbira zirkuituaren hamargarren edizinoan

| Ikusi handiago | Argazki originala

Laburbira film laburren zirkuitua Erandion hasiko da aurten, martiaren 4an, 19:00etan, Josu Murueta kultur etxean. Martiaren 20ra arte, Bizkaia, Araba eta Gipuzkoako 20 herritan izango da Laburbira. Bizkaian, Sondika, Barakaldo, Bilbo, Ermua eta eta Igorrera ailegauko da Laburbiraren hamargarren edizinoa. Londresen eta Parisen be antolatu ditue emonaldiak.

Topagunea Euskera Alkarteen Federazinoak ipini dau martxan Laburbira, herriz herriko euskera alkarteekaz alkarlanean, eta Eusko Jaurlaritzaren kultura saileko zein Araba, Bizkaia eta Gipuzkoako Foru Aldundien babesagaz. Euskerazko ikus-entzunezko produkzinoa ezagutarazo eta herrietako kultur eskaintzea aberastea da ekimenaren helburua, Topaguneko arduradunek adierazo dabenez.

Saio bakotxean, zortzi film labur eskainiko dira, danak 2011n eta 2012an sortutakoak. Ordu eta laurden inguruko emonaldian izango dira. Sormena, dokumentala, fikzinoa zein animazinoa buztartzen dituen ikus-entzunezkoak eukiko doguz, adierazo dabe antolatzaileek. Behar danak Durangoko Azokako Irudienea gunean izan ziran, abenduan. Film laburren zuzendariei jagokienez, ibilbide luzeko egileen eta sortzaile barrien lanak tartekatu ditu Laburbirak.

Ondoko zortzi film proiektauko ditue: Beerbug (Ander Mendia), Berriro igo nauzu (Carlos Rodriguez), Desentxufatuak (Bernues anaiak), Deus et machina (Koldo Almandoz), Elkartea (Kote Camacho), Hamaiketakoa (Telmo Esnal), Oinaze egoitzak (Oihan Amezua, Karlos Ibarbia, Netzer Bereziartua, Asier Sustaeta) eta Tortila (Iñigo Lopez).

Sortzaile eta ikusleen arteko eretxi trukea oso aberasgarria dala erakutsi dau Laburbirak. Horregaitik, egileak eta ikusleak alkarrengana hurreratzeko asmoz, saio batzuetan barriketaldia egingo da zuzendariagaz, emonaldiaren ostean, dinoe Topagunekoak.

Film laburren sinopsiak eta emonaldien egutegia, hemen.