Carlos Saura zinemagileak 54. Zinebi jaialdiko Ohorezko Mikeldia jasoko dau

| Ikusi handiago | Argazki originala

Carlos Saura zinemagilea omenduko dau aurtengo Zinebi Bilboko Zine Dokumental eta Film Laburren Nazinoarteko Zinemaldiak, jaialdiko arduradunek jakinarazo barri dabenez. Saurak zemendiaren 16an jasoko dau Ohorezko Mikeldia, Bilboko Arriaga Antzokian. Bertan egunean hasiko da 54. Zinebi, eta hilaren 23an amaituko da.

Carlos Saurak Los golfos, La caza, La prima Angélica, Elisa vida mía eta Flamenco film ezagunak zuzendu ditu. Urtarrilean Bilbon eta Bizkaiko beste leku batzuetan beharrean egongo da, Idem 4 etxeak produzidutako 33 días filmetan. Antonio Banderas, Imanol Arias, Barbara Goenaga eta Gwyneth Paltrow aktore ezagunek hartuko dabe parte, besteak beste, pelikula barrian. Pablo Picassok Guernica koadroa egiteko ebatzia zelan hartu eban azaltzen da pelikulan.

Aurkikuntza estetikoz eta arrakastez betetako zinemagintzea egin dau Saurak, Zinebiko iturrien arabera, eta zinemeak Espainian izan dauan bilakaerea ulertzeko eta, ondorioz, Europako zinema garaikidearen bilakaerea ulertzeko ezinbestekoa da, adierazo dabe.

Sail Ofizialaren ganean

54. Zinebi jaialdiak 3.505 film jaso ditu, horreetatik 73 aukeratu ditu Sail Ofizialean parte hartzeko. Aurten igaz baino 484 film gehiago ailegau dira. Zinemaldiak hiru kategoria ditu: fikzinoa, dokumentalak eta animazinoa.

Zortzi euskal zinemagileren lanak lehiatuko dira Zinebin: Los perfeccionistas, Tucker Dávila Wood; Aner, Unai Gárate; Voice Over, Martín Rosete; Je me souviens, Gentzane Martínez de Osaba: Berriro igo nauzu, Carlos Rodríguez; Bajo la almohada, Isabel Herguera; Beerburg, Ander Mendia; eta, Gernika, Ángel Sandimas.

Pelikulen proiekzinoak Alondigako auditorioan, Golem zinema-aretoetan, Arte Eder Museoan eta Guggenheim museoan egingo dira. Zabaltze eta amaiera ekitaldiak Arriaga antzokian izango dira.