Sormena, euskerea eta jantzak buztartzen dituan Sopel&Dub lehiaketea antolatu dabe Sopelan

| Ikusi handiago | Argazki originala

Sopelako Udalak eta Euskera Zerbitzuak sormena, euskerea eta jantzak buztartzen dituan Sopel&Dub lehiaketea antolatu dabe. Lehiaketearen bidez, sopeloztarrek euren sormena lantzeko aukerea izango dabe, sari potoloak eskuratuz gainera.

Horretarako, lip dub bat egin beharko dabe. Lip dub ikus-entzunezko mota bat da: kanta ezagun bat entzuten dan bitartean, bideokamera batek ibilbide bat egiten dau, ibilbidean zehar topetan diranek abestiaren berbak ezpainez (lip) jarraitzen eta jantzaz antzezten daben bitartean.

Sopelako edozein taldek izango dau aukerea parte hartzeko: koadrilek, ikasle taldeek, kirol taldeek, musika taldeek, kultur taldeek eta abar. Ezinbesteko baldintza bi baino ez dira egongo: alde batetik, euskera hutsez abestutako kantak onartuko dira, lehiaketearen helburuetako bat euskerearen erabilerea bultzatzea baita, eta bestetik, grabazinoa Sopelan egitea behar-beharrezkoa izango da.

Gainera, lip dub bat danez, irudiaren grabazinoa sekuentzia planoan (plano bakarrean) egina izan behar da. Ez da bideo edizinorik onartuko, lehenengo bost segundoetan eta azken bost segundoetan izan ezik (bideoaren tituluak eta bestelako errotulazinoak sartzeko).

Izena emoteko hiru bide egongo dira: www.sopelandub.com blogean topau daitekeen formularioa betez; info@sopelandub.com helbide elektronikora e-posta bat bialduz; eta 673 32 20 38 telefonora mezu bat bialduz. Taldearen izena, arduradunaren izen-abizenak eta arduradunaren telefonoa bialdu beharko da. Lanak aurkezteko epea zemendiaren 28ra arte egongo da zabalik.

Gainera, gidoiak lantzeko eta lip dub-ak prestatzeko tailerrak eskainiko dira urriaren 22tik 28ra bitartean. Halan da be, ez da derrigorrezkoa izango tailerretara joatea lehiaketan parte hartzeko.

Tailerretara etorten diran taldeei produkzino lanak antolakuntzatik egitea eskainiko jake, horretarako beharrezko tresnak eta profesionalak jarriz. Grabazinoak zemendiaren 9tik 11ra eta 16tik 18ra izango dira.

Txapeldunek 1.000 euroko bonoa jasoko dabe Sopelako dendetan gastetako. Urriaren 4an, bestalde, herriko taldeentzat bilera edegia antolatu da, lehiaketearen inguruan informazinoa emoteko. Hitzordua 19:00etan izango da, Kurtzio Kultur Etxean.