Bilbo, Manhattaneko Film Laburren Jaialdiaren uriburu bihurtuko da

| Ikusi handiago | Argazki originala

Bilbo 2012ko Manhattan Short Film Festival jaialdiaren uriburu bihurtuko da gaur, hilak 28, eta bilbotarrek bertan parte hartzeko eta botoa emoteko aukerea izango dabe.

Bost kontinenteetako 250 uritan 100.000 lagun baino gehiago alkartuko dira jaialdiaren 14. edizinoa jarraitzeko. Zinema, galeria, museo eta kafetegietan batuko dira film laburrez gozetako, eta irabazlea euren botoen bidez aukeratzeko. Bilbok Jaialdiaren azken bost edizinoetan parte hartu dau, eta irabazlea mundu osoko ikusleakaz batera aukeratu ahal izan dau.

EITBk antolatutako jaialdia Bilboko Kultura eta Hezkuntza Saila eta Cineclub FASen laguntzinoagaz, EITBko Multibox aretoan jarraitu ahal izango da, irailaren 28an, arratsaldeko 19:00etan. Emonaldia edegia da, eta parte hartu ahal izateko manhattanshort@eitb.com helbide elektronikora izen-abizenak bialdu behar dira.

One Week, One World, One Festival goiburuak adierazoten dau Manhattan Short Jaialdiaren filosofia. Astebetean, munduko hainbat aretotan, edizino honetako 10 film labur finalisten emonaldiak antolatuko dira, eta publikoa izango da irabazlea aukeratuko dauena. Ikusle bakotxak boto-txartel bat jasoko dau emonaldiara sartzen danean, eta proiektautako film laburren artean gogokoenari emon beharko deutso botoa. Proiekzinoa amaitukeran txartelak jaso, eta zenbaketea egingo da. Botazinoaren emoitzea e-mail bidez bialduko da Manhattanera. Mundu osoko boto guztiak zenbatu ondoren, irabazlea datorren urriaren 7an jakinarazoko dabe, New York urian egingo dan ekitaldi batean.

10 film labur

Irailaren 28an, EITBren egoitzako Multibox Aretoan, ondoko 10 film labur finalistak izango dira ikusgai:

- The devil´s ballroom. Henrik M Dahlsbrakken (Norbegia).
- A curious conjunction of coincidences. Joost Reijmers (Herbehereak).
- Where does the sea flow. Vitaly Soltykov (Errusia).
- Two & two. Babak Anvari (Erresuma Batua).
- Cluck. Michael Lavelle (Irlanda).
- Behind the mirrors. Julio O Ramos (Peru).
- The elaborate end of Robert Ebb. Clement Bolla, Fx Goby, Matthieu Landour (Erresuma Batua, Frantzia).
- Superman, Spiderman or Batman. Tudor Giurgiu (Errumania).
- 92 Skybox Alonzo mourning rookie card. Todd Sklar (AEB).
- Voice Over. Martin Rosete (Espainia).