Michael Hanekeren 'Amour' filmak Fipresci Sari Nagusia jasoko dau Donostia Zinemaldian

| Ikusi handiago | Argazki originala

Zinematografiako Prentsaren Nazinoarteko Federazinoak (Fipresci) Michael Haneke zuzendariaren Amour filmari emongo deutso urteko film onenaren Sari Nagusia. Fipresciko kide diran mundu osoko 225 kritikarik azken urtean estreinautako filmen artetik bat aukeratzen dabe, bozketa bidez, Sari Nagusia emoteko. Saria 60. Donostia Zinemaldiaren inaugurazino galan banatuko dabe, irailaren 21ean, Kursaalaren Auditoriumean.

Zinemaldi donostiarraren arduradunek adierazo dabenez, Amour filmak inaugurauko dau 60. edizinoko Zabaltegi-Perlak saila; aurreko maiatzean Canneseko zinemaldian Urrezko Palmorria irabazi eban. Jean-Louis Trintignant, Emmanuelle Riva eta Isabelle Huppert dira protagonistak, eta filmak 80 urte dituen Georges eta Anne musika-irakasleen arteko hartu-emonak ditu berbagai. Euren arteko maitasuna kolokan jarriko da emakumeak bihotzekoa izan eta bere gorputza paralizauta geratzen danean.

Fipresciko idazkari nagusi Klaus Ederek emongo deutso saria filman parte hartu dauen Ramon Agirre aktoreari, Michael Haneke zuzendaria ezingo baita inaugurazino galan egon. Hanekek Fipresci Sari Nagusia irabazten dauen bigarren aldia da, Donostia Zinemaldiaren 57. edizinoan be irabazi ebalako, Das weisse Band (2009) filmagaz.

Fipresci Sari Nagusia munduko zinemagile garrantzitsuenetakoek eskuratu dabe Donostia Zinemaldiaren aurreko edizinoetan, besteak beste, Pedro Almodovar, Paul Thomas Anderson, Jafar Panahi, Kim Ki-duk, Aki Kaurismäki, Nuri Bulge Ceylan, Jean-Luc Godard, Cristian Mungiu, Roman Polanski eta Terrence Malickek.