Tommy Lee Jonesek aurtengo hirugarren Donostia saria jasoko dau

| Ikusi handiago | Argazki originala

Tommy Lee Jones aktoreak aurtengo Zinemaldiko hirugarren Donostia saria jasoko dau, Oliver Stone zuzendaria eta Ewan McGregor aktorea be sarituko ditualako aurten 60. Zinemaldiak. Irailaren 28an jasoko dau Donostia Saria Tommy Lee Jonesek, Kursaalen egingo daben ekitaldian.

Texaseko San Saba urian jaio zan, eta Love Story lanagaz (1970) abiatu zan zinema munduan. Besteak beste, honako filmetan parte hartu dau: Eyes of Laura Mars (1978), Coal Miner’s Daughter (1980), Stormy Monday (1988), The Package (1989), JFK (1991), Under Siege (1992), The Fugitive (1993), Heaven and Earth (1993), The Client (1994), Natural Born Killers (1994), Batman Forever (1995), Men in Black (1997), U.S. Marshalls (1998), Double Jeopardy (1999), Rules of Engagement (2000), Space Cowboys (2000), Men in Black 2 (2002), The Hunted (2003), The Missing (2003), In the Electric Mist (2009), The Company Men (2010) eta Captain America: The First Avenger (2011).

The Fugitive (1994) lanagaz, antzeztaldeko aktore onenaren Oscar saria eta Urrezko Globoa irabazi zituan. Hiru urte lehenago izentau eben lehenengoz Oscar sarietarako, Oliver Stone zuzendariaren JFK filmagaitik. 2007an, In the Valley of Elah filman egindako lanari esker, Oscar sarietarako izentau eben barriro. Urte horretan bertan Oscarra irabazi eban Joel eta Ethan Coen anaien No Country for Old Men filmako protagonista izan zan Tommy Lee Jones.

Oraintsu, K agentearen papela egin dau barriro Men in Black 3 pelikulan, eta abenduan estreinauko dan Steven Spielbergen Lincoln pelikulako protagonistetako bat da. Peter Webber zuzendariaren The Emperor filma amaitu barri dau, eta, datorren urtean, Malavita pelikulako protagonista izango da Michelle Pfeiffer eta Robert De Nirogaz batera.

Egin dauen lanik barrienean, Hope Springs, protagonista da, Meryl Streep ezagunagaz batera, eta Donostiako Zinemaldiko Zabaltegi Perlak sailean aurkeztuko dabe.