Bilboko Zinemaldi Fantastikoak kultur jarduerak proposatu ditu zine programazinoaren osogarri

XVIII. Fant, Bilboko Zinemaldi Fantastikoaren Jaialdia datorren barikuan, maiatzaren 4an, abiatuko da, kalidadezko zine programazino zabalagaz, ez zine zaleei zuzendua bakarrik, baita genero fantastikora lehenengo aldiz hurreratu nahi dabenei be zuzendua. Aurreko edizinoetan lez, zinemaldia antolatu dauen Bilboko Udaleko Kultura eta Hezkuntza Sailak, familia osoari zuzendutako zenbait kultur eta aisia jarduera antolatu ditu, herritar guztiek fantasiazko giroan sartzeko aukerea izan deien, baita zine aretoetatik kanpo be.

Bizkaiko Foru Aldundiaren eta Bilboko Kultura eta Hezkuntza Sailaren esku dagoan Bilboko Berreginen Museoak bat egingo dau zinemaldiaren edizino honegaz, Izaki FANTastikoak izeneko bisita-tailer programeagaz. 8 eta 12 urte arteko umeei (eta eurekaz doazenei) zuzendutako jarduerak maiatzaren 5ean izango dira, goizez; goizeko 10:00etan euskeraz eta eguerdiko 12:00etan gaztelaniaz. Bisita tailer horreetan, umeek eta nagusiek, museoan bizi diran pertsonaia bitxienak ezagutu ahal izango ditue: hegoak dituen izakiak, suge oinak dituenak, erdi gizaki erdi animalia diran izakiak… Baina, izaki horreen bitartez mitologia greziarraren mundu fantastikoa eta imajinazinoz betetakoa ezagutzeaz gan, partaideek euren izaki fantastikoa be egin ahal izango dabe, gure eguneroko bizitzan oso ohikoa dan animalia batean oinarrituz: katua.

Programea berezia danez, beharrezkoa izango da aurretik erreserbea egitea parte hartu ahal izateko, Museoko Hezkuntza Zerbitzuaren telefono zenbakian: 944150231. Gehienez be 14 umek hartu ahal izango dabe parte, beti be heldu batek lagunduta. Bisita-tailerrak 3 € balioko dau ume bakotxeko.

I love clicks

Maiatzaren 2tik 15era, Fant: I love clicks erakusketea bisitau ahal izango da. Erakusketeak fantasiazko eta bildurrezko film mitikoen 35 kartel jasoko ditu, baina kartelen protagonistak Playmobilen panpina txiki ezagunak izango dira. Erakusketea Zazpi Kaleetan dagoan Burtsako Udaltegiaren eta Fant-eko edizino honen laguntzaile berezi diran Abando Hoteleko atariaren, Art Kafe Tabernearen eta Domenicos jatetxearen artean banatuko da.

Bersino horreek egitearen ideia Mauro Solbes eta Aarón Mira valentziarrena da. Playmobilen klik batzuk Mairuen eta Kristauen erropez jazten hasi ziran, eta, azkenean, mota guztietako pertsonaiez mozorrotu ditue euren iloveclicks.es webgunerako. Oraingo honetan, El Exorcista laneko Karras apaiza, E.T. edo Matrix filmeko Neo, plastikozko izaki artikulatu txiki bilakatuko dira.

Fant menua

Domenicos jatetxeak eta Art Kafe Taberneak —biak Alondigearen inguruan dagozanak— oso leku egokiak izango dira indarrak berreskuratzeko eta proiekzinoen erritmoari jarraitzeko. Holan, jatetxe italiarrak Fant menu berezia eskainiko dau zinemaldiak irauten dauen bitartean, ausartenei bakarrik zuzendutako eta genero fantastikora egokitutako proposamenez osotua. Eta horren aurreko espaloian, Art ezagunak, efektu bereziak izango dituan Fant-cocktail barria sartuko dau bere kartan.

Beste alde batetik, Irudi idiliko gitxiago! Zatarkeria, bildur eta nazka gehiago! lelopean, Bilboko Zinemaldi Fantastikoak — Fant 18k, Aux magazinegaz eta BilbaoCentrogaz alkarlanean, erakusleiho lehiaketa bat antolatu dau. Lehiaketa horretan, BilbaoCentroko kide diran saltokiak aurkeztu ahal izango dira, fantasiazko edo bildurrezko apainketak erakutsiz, maiatzeko lehen hamabostaldian.

Orain arte, ekimen horretan izena emon daben dendak ondokoak dira: Nolita Loft, Bbailliére, La Clé eta Liguria moda dendak, Améie zapata denda. Horrezaz gan, izena emon dabe, baita be, Aldo Black eta Raul Andreas ule-apaindegiek, Basconia liburudendeak, Globartistek, Blue Moon pub-ak edo Kos Inplante Institutuak. Horreek guztiek harrituta itxiko ditue oinezkoak euren erakusleiho bitxiakaz, eguazten honetatik aurrera.

Ikusi argazki guztiak handiago