UEU-k inoiz baino ikastaro gehiago antolatu ditu udabarrian krisiari aurre egiteko

| Ikusi handiago | Argazki originala

Udako Euskal Unibersidadeak (UEU) bere Ikastetxe Nagusiko udabarriko eskaintzea aurkeztu dau gaur, etenbako prestakuntzea herritar guztiei zabaltzeko asmoz. Gaurkotasuna, kalidadea, gizartearen preminak eta euskerazko formazinoa ardatz, urtez urte eskaintza akademikoa ugaritu dau, bai kopuruan eta bai jorratutako gai eta ildoei jagokenean be. UEUk bizi dauen egoera gatxa kontuan hartuta, euren nahia da ikastaro honeetan inoiz baino jente gehiagok izena emotea.

Prentsaurrekoan Ane Sarasuak, UEUko Idazkari Nagusiak, Mari Karmen Menikak, UEUko Ikastetxe Nagusiko arduradunak eta Esther Kareagak, Eibarko Euskara-Kultura batzordeburuak parte hartu dabe.

Ane Sarasuak gaur egun etenbarik ikasteak dauen garrantzia eta behar hori asetzeko UEUk egin dauen apustua azpimarratu dau: bizi dogun krisi garai honetan, ezinbestekoa bihurtu da gure ezagutzak etenbarik barritzen joatea. Helburu horri jarraituz, UEUk orain sei ikasturte UEUren Markeskoako Ikastaroak (udabarrian eta udagoienean) abiatu genduzan, kalidadezko goi-mailako euskerazko formazinoa eskaintzeko asmoz. Erantzuna oso ona izan da, izan be, ordutik hona partehartzea etenbarik goruntz joan baita. Partaideen datuei begiratzen badeutsegu, ikastaro honeetara hurreratzen dan personearen profila honakoa da: emakumezkoa, 30 urtetik gorakoa, unibersidadeko ikasketak egina dituana eta lanean dagoana. Ziklo hau be aurrekoak bezain arrakastatsua izatea espero dogu, are gehiago gure erakundeak bizi dauen egoera gatxari aurre egiteko. Gastuak murrizteko hainbat erabagi gogor hartu doguz, eta orain, gure asmoa da gure sarrera propioak handitzea. Eta horretarako matrikulak behar doguz. Beraz, jenteari dei egiten deutsagu ikastaroetan parte hartu daian, ikasteaz gan UEUri lagunduko deutsolako. Azkenik, ez neuke nire berbaldia amaitu nahi Eibarko Udalari eskerrak emon barik. Gure aldeko apustua egin eben orain 11 urte eta benetan pozten gaitu horrek. Aurrerantzean be alkarlanean jarraitzea da gure asmoa.

Esther Kareagak, Eibarko Udaleko Euskera-Kultura Batzordeburuak UEUk euskal gizartean beteten dauen papela garrantzitsua dala aitatu dau, eta Eibarko Udalarentzat ohorea dala UEUk egoitza akademikoa bertan eukitea, Eibarri emoten deutson erreferentzialtasunagaitik. Ondoren, eibartarrek ikastaro honeetan izena emoteagaitik laguntzak izango dituela adierazo dau, eta matrikulea egintera dei egin deutse guztiei.

Mari Karmen Menikak udabarriko eskaintzea osotzen daben hamar ikastaroen zehetasunak emon ditu:

1.- Informatika eta teknologia barriak

- Moodle-ren erabilera aurreratua.

- Teknologia barriak eta intimidadea. Zelan babestu pribatutasuna zure datuetan eta komunikazinoetan

- Dokumentu tekniko eta zientifikoen edizinoa LaTex-en bidez

2.- Giza eta gizarte-gaiak

- Argazkigintza dokumentala. Proiektu personala.

- Bilerak dinamizetako teknikak.

- Gaixotasunen sustrai emozionala.

- Irakaslea eszenan.

- Kantuz eta jolastuz komunikazinoa lantzen.

- Komunikazino eraginkorraren artea (II. Modulua).

- Sormena lantzeko tailerra.

Eskaintzea antolatzeko orduan ondoko helburuak izan dira kontuan:

- Gaurkotasuna daben gaiak eskaintzea.

- Gizartean dagozan preminei erantzutea.

- Aurreko edizinoetako ikastaro arrakastatsuei jarraipena emotea.

- Interes orokorreko gaiak lantzea.

- Kalidadezko eskaintzea egitea.

- Euskerazko formazinoaren eskaintzea zabaltzea Eibar eta debabarrenean.

Era berean, formatu desbardinak planteetan ditu UEUk, ikastaroen izaerea kontuan izanik, ahalik eta jente esparru zabalagora heltzeko asmoz: ikastaro laburrak dira (8-25 ordukoak); formatu desbardinetan: astean zehar, arratsaldeko ordutegian edo zapatuetan. Ikastaro bat on line izango da. Irakasleak adituak dira. Dokumentazinoa eskaintzen da.

UEUk diru-eskaerea egin dau debarroko udaletxe guztietan bertako herritarrentzat dirulaguntzak lortzeko. Momentu honetan baiezkoa emon dabenak Eibar eta Elgoibarko Udalak dira. Horrezaz gan, matrikula prezio bereziak izango ditue ikasle, lanbako eta jubilatuek.

Dagoeneko ikastaroetarako matrikulazino-epea zabalik dago. Informazino gehiago edo matrikulea egiteko nahikoa da www.ueu.org helbidera sartu, 943 82 14 26 telefonora deitu edota UEUren bulegotik pasetea (9:00etatik 17:00etara).