'Gizazine Crac XXI: Balioen krisitik ekonomia-krisira eta alderantziz' programea Bilbon, zinemaren bidez krisiaren zenbait ikuspegi eskaintzeko

| Ikusi handiago | Argazki originala

Bilboko Udaleko Kultura eta Hezkuntza Sailak Gizazine Crac XXI: Balioen krisitik ekonomia-krisira eta alderantziz programea inaugurauko dau gaur, hilak 23. Programea barikura arte egingo da San Frantziskoko Udaltegian. Ekimen horren barruan film laburrak eta luzeak –dokumentalak eta fikzinozkoak– eskainiko dira, gaur egun sufriduten gagozan krisi ekonomikoaren ikuspegi desbardinetara hurreratzeko. Programeak, Caostica alkartearen eta Zinebiren, Bilboko Zine Dokumental eta Laburmetraia Nazinoarteko Zinemaldiaren laguntzinoa dauka.

Gizazinearen bigarren edizinoa Bilbo Zaharra auzora itzuliko da aurten, formatu barriagaz eta borbor dagoan gai baten inguruko egitarauagaz: gaur egun bizi dogun krisia. Crac XXI, zemendiaren 23an, 24an eta 25ean egingo da San Frantziskoko Udaltegian, zinemaren, performancearen eta Bizkaiko 15M mobimentuagaz egingo dan solasaldiaren bitartez gogoeta kritikoa proposatuz.

Programazinoa eguaztenean hasiko da, Rodrigo Cortésen Concursante (2007) filmagaz. Ondoren, A-Teatral taldearen Imprevistos performance ikuskizuna eszenaratuko da. Hurrengo egunean, Michael Winterbottomen eta Mat Whitecrossen La doctrina del shock (2009) dokumentala eskainiko da, eta haren ondoren, mahainguru bat antolatuko da Bizkaiko suminduen taldeagaz, M15M Bizkaia: jatorria, egungo egoera eta etorkizunerako planak berbaldiagaz.

Barikuan, hilaren 25ean, ZinebiExpress lehiaketan saritutako film laburrak emon ondoren, programeari amaierea emongo jako, DJ Mr. Chacek eta VDJ Nauseasek alaitutako musika saioagaz. Ekitaldi guztietarako sarrerea dobakoa izango da.

Gizazine Crac XXI. Egitaraua

- Zemendiak 23

20:00 - 21:30 Concursante (2007) Rodrigo Cortes (Film luzea).
21:30 - 22:30 Imprevistos A-Teatral (performance ekitaldia).

- Zemendiak 24

20:00 - 21:19 La doctrina del shock (2009) Michael Winterbottom, Mat Whitecross (dokumentala).
21:20 - 22:30 Berbaldia: M15M Bizkaia: jatorria, egungo egoerea eta etorkizunerako planak.

- Zemendiak 25

20:00 - 21:15 Zinebi Expresseko irabazleak + Caosticako film laburrak (film laburrak).
21:15 - 23:00 Crac Festa: DJ Mr. Chace + VDJ Nauseas.