Badator III. Kilkerren Soka, euskal literaturea eta irakurzaletasuna sustatu eta bultzatzeko ekimena

| Ikusi handiago | Argazki originala

111 Akademiak liburu aurkezpenak ardatz izango dituan Kilkerren Soka egitasmoa abiarazoko dau zemendiaren 9an. Akademiak euskal literaturea eta irakurzaletasuna sustatu eta bultzatu eta euskal literaturan izan dan urteko sorkuntzea ezagutzera emon nahi dau eta, esangura horretan, sorkuntza hori irakurleakaz konpartiduteko aukerea eskaintzen jake idazleei.

Aurten, Anjel Lertxundi, Antonio Casado da Rocha, Xabier Artola eta Leire Bilbao izango dira protagonista. Ohikoa dan legez, liburua aurkeztuko dauen idazleak bidaidea izango dau alboan, honek liburua aurkeztuko dau, irakurle lez liburuaren balorazino bat eginez, eta zubi lana egingo dau idazlearen eta hurreratzen diran irakurleen artean.

Leire Bilbaoren azken lanagaz emongo jako hasierea hirugarren ziklo honi. Zemendiaren 9an, idazle ondarrutarrak Scanner aurkeztuko dau Tolosako Bonberenean, 19:00retan eta Xabier Mendiguren Elizegi izango dau bidelagun.

Hurrengo hitzorduan, zemendiaren 15ean, Anjel Lertxundi izango da protagonista Andoaingo Liburutegian, 19:00retan, Etxeko hautsa nobela aurkezten, Jorge Gimenez Bech laguntzaile dauela. Zemendiaren 22an, Oreretako Mikelazulon, Antonio Casado da Rochak Esku ezkerraz poema liburua aurkeztuko dau eta Oier Guillan izango dau lagun. Hilaren 24an, barriz, Xabier Artolak Argi-itzalen neurria ipuin liburua aurkeztuko dau Larrabetzuko Anguleri kultur etxean, 20:00retan eta Arantxa Urretabizkaia izango dau lagun.

Jon Arretxe, Patziku Perurena, Iban Zaldua, Yurre Ugarte, Kepa Altonaga eta Eider Rodriguez izan ziran igazko protagonistak.