Zazpi film eskainiko ditue Zinemaldiko Zinemira sailean

| Ikusi handiago | Argazki originala

Aurten zazpi pelikula proiektauko ditue Donostiako Zinemaldiko Zinemira sailean, Euskal Herrian egindako zinemeari eskainitako atalean, hain zuzen be. Zazpi lanetatik hiru estreinaldiak izango dira. Euskal Zinemaren Galea Victoria Eugenia antzokian izango da, irailaren 21ean.

Bi anai pelikulearen estreinaldiak zabalduko dau Zinemira saila. Bernardo Atxagaren eleberrian oinarriturik, Imanol Rayak zuzendu dau filma. Egun berean, galan, Elías Querejeta ekoizleak Zinemira saria jasoko dau. Sariak euskal zinemagintzako persona ospetsu baten ibilbidea nabarmentzen dau.

Rayaren lanaz gan, beste behar bi estreinauko dira, biak be dokumentalak: David Aguilarren Nao Yik eta Enara Goikoetxea eta Iurre Telleriaren El último paso. Hiru lanok Serbitzu Zinemira saria irabazteko lehiatuko dira. Serbitzu sariaren helburua euskal kulturea eta industria zinematografikoa garatzen laguntzea da. Irabazleak 20.000 euro gordin jasoko ditu.

Panorama atalean, besteak beste, Alberto Gorritibereak zuzendutako Arriya eta Fermin Muguruzaren Next music station: Lebanon dokumentala emongo ditue.

Zinemira sailaren barruan, modu berean, 2011ko Kimuak katalogoko film laburren aukeraketea be izango da. Kimuak Eusko Jaurlaritzako Kultura Sailaren eta Euskadiko Filmategiaren arteko ekimena da, eta helburua urteko film labur nabarmenenak zabaltzea da. Kimuak aukeraketearen barruan bederatzi film labur bildu ditue.

Horrezaz gan, Zinemaldiak Euskadiko Filmategiagaz lankidetzan jardungo dau Euskal Herriko ondare zinematografikoko obra zaharberrituak emoteko. Aurten Gotzon Elortza zinemagile bizkaitarraren hiru dokumental labur aurkeztuko ditue; hain zuzen be, euskera hutsean sortutako eta filmautako historiako lehenengo pelikulak.