Davies, Kore-Eda, Ripstein eta Polley, Donostiako Urrezko Maskorra irabazteko lehian

| Ikusi handiago | Argazki originala

Terence Davies, Hirokazu Kore-Eda, Arturo Ripstein, Wang Xiaoshuai, Sarah Polley eta Julie Delpy zuzendariek Donostiako 59. Zinemaldiko Urrezko Maskorra irabazteko lehiatuko dira, irailaren 16tik 24ra bitartean. Horrezaz gan, ondoko honeek be parte hartuko dabe Sail Ofizialean: Ana Katz, Mathieu Demy, Filippos Tsitos, Joao Canijo eta Björn Runge.

The Deep Blue Sea aurkeztuko dau Terence Davies zuzendari britainiarrak . Rachel Weisz, Tom Hiddleston eta Simon Russell Beale dira protagonista nagusiak, eta Terence Rattiganen izenburu bereko antzezlanaren egokitzapena da. 2008an atzerabegirakoa eskaini eutson Zinemaldiak Daviesi.

Arturo Ripstein zuzendari mezikarrak Las razones del corazón lanean Gustave Flauberten Madame Bovary eleberriaren azken atalen egokitzapena egin dau. Ripsteinek birritan irabazi dau Urrezko Maskorra: 1993an, Principio y fin filmari esker, eta, 2000an, La perdición de los hombres lanagaz. Epaimahaiaren Sari Berezia irabazi eban 1978an, El lugar sin límites pelikuleagaz.

Hirokazu Kore-Eda japoniarrak Kiseki ('I Wish') dakar Donostiara. Hamabi urteko mutikoaren istorioa kontetan dau Koder-Edak; gurasoak diborziau ziranetik anaia urrun bizi da, eta apenas alkar ikusten daben. Anaia ikustea da mutikoaren amesa. Zinemagile japoniarraren Maborosi no hikari (1995) lana Veneziako Mostra jaialdian saritu eban. Aurtengoa laugarren aldia izango dau Donostian; lehenago Wandâfuru raifu (1998), Hana yori mo naho (2006) eta Aruitemo, aruitemo (2008) beharrak erakutsi ditu.

Take this waltz drama erromantikoagaz etorriko da Sarah Polley aktore, zuzendari eta ekoizleak. Michelle Williams eta Seth Rogen aktoreek jokatuko dabe protagonisten rola. Polleyk hainbat film labur sortu ditu, eta 2006an Away from Her film luzea zuzendu eban. Lan horri esker, Oscar sarietan izendapen bi izan zituan.

Julie Delpy aktore eta zuzendari frantziarrak bere laugarren filma aurkeztuko dau, Le Skylab. Familia batzar baten inguruko komedia nostalgikoa da, 70eko hamarkadan girotua. Delpy bera da zuzendaria eta protagonistea. Hamalau urtegaz debutau eban, Jean-Luc Godarden zuzendaritzapean. Makina bat zuzendarigaz egin dau behar: Léos Carax Bertrand Tavernier, Agnieszka Holland, Krzystof Kieslowski, Richard Linklater eta Jim Jarmusch. Looking for Jimmy (2002), Two Days in Paris (2007) eta The Countess (2009) pelikulak zuzendu ditu.

Sail Ofizialean izango dan beste zuzendari bat Wang Xiaoshuai zinemagilea da.Txinatarrak 11 Flowers aurkeztuko dau Donostian. Lanak Mao Zedong hil aurreko garaia kontetan dau, ume baten ikuspegitik. Shiqi sui de dan che ( 2001) pelikuleagaz Berlingo Zilarrezko Hartza irabazi eban Xiaoshuai, eta handik sei urterazuen zuzendariak, eta, sei urte geroago, Gidoi Onenaren Zilarrezko Hartza jaso eban, Zuo You lanari esker.

Los Marziano Ana Katz zinemagile argentinarraren filmak Guillermo Francella eta Arturo Puig ditu protagonista. Aspaldi haserretu ziran anai biren istorioa azaltzen dau. Ana Katz gidoilari, aktore eta zuzendariaren lehenengo lana El juego de la silla (2002) izan zan. Pelikula horrek Donostiako Zinemaldiko Zinema Eraikitzen eta Zabaltegi-Zuzendari Barriak sailetan parte hartu eban. Bere bigarren lana be (Una novia errante, 2007) Zinema Eraikitzen Sailean izan zan.

Joao Canijo postugaldarrak Sangue do meu sangue Lisboako auzo batean girotutako melodramea ekarriko dau Donostiara. Manoel de Oliveira, Alain Tanner eta Wim Wenders zuzendarien laguntzailea izan da Joao Canijo. Canneseko zinema-jaialdiko Un Certain Regard Sailean hartu dau parte, Ganhar a vida (2000) eta Noite Escura (2003) lanekaz.

Mathieu Demyk Americano filma aurkeztuko dau Zinemaldian, bere lehenengo film luzea. Gazte frantziar batek Mexikon egindako bidaia kontetan dau. Salma Hayek, Géraldine Chaplin eta Chiara Mastroianni aktoreak dira protagonistak. Besteak beste, Agnès Varda, Michel Hazanavicius, Pascal Bonitzer, Benoît Cohen, Michel Deville, André Téchiné edo Jean-Pierre Mocky zinemagileekaz egin dau lan.

Filippos Tsitos zuzendari greziarrak Adikos Kosmos komedia dramatikoa aurkeztuko dau.Mundu justuago bat lortu gura dauen polizia baten gora-behera bitziak kontetan ditu.Tsitos (Atenas, 1966) Berlingo zinema-jaialdian lehiatu zan My Sweet Home (2001) bere lehenengo lanagaz.

Happy end Suediako produkzinoa da, eta Björn Runge dau zuzendari. Emakumeek gaur egungo gizartean jasaten dituen tratu txar psikologiko eta fisikoak jorratzen ditu. Björn Runge Roy Andersson zuzendariaren laguntzaile hasi zan zinemagintzan, eta sarritan egin dau lan telebistaren eta dokumentaletan. Harry och Sonja (1996) eta Raymond-sju resor värre (1999) film luzeak zuzendu ostean, Berlingo zinema-jaialdiko Aingeru Urdina saria irabazi eban Om jag vänder mig om/Daybreak lanagaz, 2003an.