Zubererazko 'Xora' fikzinozko film luzearen grabazinoa astelehenean hasiko da

| Ikusi handiago | Argazki originala

Xora, zubererazko fikzinozko lehenengo filma, aurkeztu eban atzo Peio Cachenaut zuzendariak Donostian. Astelehenean, garagarrilaren 18an hasiko dabe grabazinoa; danetara hiru bat aste emongo ditue lan horretan. Proiektuak 45.000 euroko aurrekontua dauka. Hainbat herritarrek eta erakundek hartu dabe parte, besteak beste, Hebentik alkarteak, Aldudarrak Bideo alkarteak eta Baleuko etxeak.

Protagonista nagusi bi ditu filmak; Jef Goihenexpek eta Tttittika Rekaltek jokatuko ditue papelak. Zuberoako gazte bat da personaietako bat (Jef Goihenexpe); euskaldun barria da, euskeraz ikasten urteak emon ostean, gaur egun irakaslea da gau eskola batean. Baina, irakaslea baino gurago leuke idazlea izan, hori da bere ametsa. Horregaitik, AEBetan gidoilari lanean makina bat urte ibili izan dan osabearengana (Tttittika Rekalt) aholku eske joatea otutzen jako gazteari.

Fikzinozko lana bada be, Peio Cachenautelek dinoenez, holangoak egunero pasetan dira Zuberoan. Uria eta mendiaren buztarketea, euskaldun barri edo euskaldun zahar izatea, baloreen transmisinoa... elementu ugari batu ditu. Lehenengo aldia da zuzendari eta gidoilari, bietara, ibili dana.

Auzolanaren garrantzia azpimarratu eben taldekideek aurkezpenean, eta laguntzinoak Bilbotik Santa Grazira heldu dirala. Herritarrek dirua batzeko kanpainea antolatu eben, orain arte ondo funzionau dau. Oraindino aukerea dago eta proiektuan laguntzeko, argibideak, Xiberoa Zinez egitasmoaren gunean.

Udagoienean montauko ditue filmaren irudiak, eta estreinaldia datorren urteko udabarrian egitea espero dabe. Dana dala, aurtengo Durangoko Azokarako aurrerapenen bat eskaini gura dabe.