Abian da lehenengo aldiz UPV/EHUren Udako I. Campus Zientifikoa

| Ikusi handiago | Argazki originala

Danetara 60 ikaslek hartuko dabe parte UPV/EHUk Udako I. Campus Zientifikoan garagarrilean, Zientzia eta Teknologia Fakultadean, Leioan. Ekimena Espainiako Hezkuntza Ministerioaren eta Zientzia eta Barrikuntza Ministerioarena da, eta DBHko 4. mailako eta Batxilergoko 1. mailako ikasleengan zientziarako interesa biztea dau helburu.

Nazinoarteko Bikaintasun Campusa dalako ahal izan dau UPV/EHUk Campus Zientifikoa antolatu. UPV/EHUk lehenego aldiz parte hartuko dau Campus Zientifikoetan, Espainiako Hezkuntza Ministerioak Euskampus proiektuari 2010eko urrian Nazinoarteko Bikaintasun Campus kalifikazinoa emon ostean. Donostia International Physics Center (DIPC) fundazinoagaz eta Tecnalia Corporación Tecnológicagaz alkarlanean sortu zan Euskampus.

Campusean sartzeko ikasleek espediente akademiko ona euki behar dabe, gitxienez 7 puntuko notakoa. Campusak aldi berean egiten dira Nazinoarteko edo Eskualdeko Bikaintasun Campus guztietan, garagarrilaren 3tik 30era bitartean. Hogei unibersidadek daukie izendapen hori. Aurten 1.200 ikaslek parte hartuko dabe, 60 unibersidade bakotxean.

Parte-hartzaile guztiek aukerea eukiko dabe ikertzaileen zereginagaz lehenengo hartu-emona izateko, eta ikerketara hurreratzeko, unibersidadeko eta bigarren hezkuntzako irakasleek atondutako proiektuen bidez. Proiektuek ezagutza zientifiko teknologikoaren arlo nagusiak jorratzen ditue: fisikea, kimikea, matematikea, natur eta ingurumen zientziak eta horreei lotutako diziplinak. Ikasle bakotxak proposatutako lau proiektuetatik bitan parte ahal izango dau: Biologia arloan, Los mejillones como centinelas de la contaminación: análisis a nivel celular y tisular; Fisikan, Física de alto voltaje: chispas, rayos y pelos de punta; Matematikan, Más que núm3ros; eta, Kimikan, La materia solamente se transforma.

DBHko 4. mailako 30 ikasleak garagarrileko lehenengo hamabostaldian izango dita, hilaren 3tik 16ra; Batxilergoko 1. mailakoak, bigarren hamabostaldian, 17tik 30era. Lehenengo txandako ikasleak Andaluzia, Asturias, Gaztela-Mantxa, Gaztela eta Leon, Katalunia, Galizia, Valentziako Erkidegoa, Madril eta Extremaduratik datoz.

Talde biek Miguel Unamuno uniberdidade-egoitzan hartuko dabe ostatu. Zientzia eta Teknologia Fakultadeko laborategietan lan egin eta berbaldi eta tailerretan parte hartzeaz gan, ikasleek hainbat jarduera ludiko-kulturaletan parte hartuko dabe: Bilboko Alde Zaharreko eraikinetan fosilak zelan aurkitu ikasi; Bilbo Arte Ederren Museoa, Arkeologia Museoa, Ingeniaritza Goi Eskola Teknikoko astronomia behatokia edo BTEK teknologiaren interpretazino zentroa bisitau. Donostiara eta Urdaibai biosfera erreserba ikusteko aukerea be izango dabe.