Diseinuari buruzko filmak ikusgai Bilboko Alondigan

| Ikusi handiago | Argazki originala

Diseinuari buruzko B Awards Bilbao Bizkaia Concept Design jaialdiak film-zikloa antolatu dau Bilboko Alondigako Golem zine-aretoan. Azkenengo urteotan diseinuaren inguruan egindako dokumentalik onenetakoak eskainiko ditue eguenean eta barikuan, jatorrizko bertsinoan.

Eguenean, hilaren 24an, 20:00etan, Gary Hustwiten Helvetica ikusteko aukerea egongo da. Filmak tipografiak gure bizitzan daukan eragina lantzen dau. Historian gehien erabili izan dan Helvetica letra mota dau oinarri pelikuleak. Egun berean, 22:00etan, Typeface dokumentala emongo dabe. Ikus eremuko kultura, teknologia eta diseinu grafikoaren inguruko lana da, eta ohiko artisau teknikak diseinu garaikideagaz dauken loturea aztertzen dau.

Zikloaren bigarren egunean, barikuan, Logorama beharra eskainiko dabe, 19:00etan. François Alauxek, Herve de Crecyk eta Ludovic Houplainek 2010. urtean animazino film labur onenaren Oscar saria jaso eben lan honi esker. Pelikulan publizidadea unibersoaz jabetzen da; mundua logoz eta publizidade mezuz betetzen da. 19:30ean, Objectified dokumentalagaz amaituko da zikloa. Diseinatzaile industrial ospetsuak agiri dira ikus-entzunezko honetan, eta gure eguneroko bizitzako objektuak sortzeko prozesuak azaltzen ditue.

B Awards Bilbao Bizkaia Concept Design Festival diseinu kontzeptualaren inguruko jaialdia da, Bizkaian eta Euskadin diseinua sustatzeko asmoagaz antolatua. Festibala Bilboko Udalaren eta Bizkaiko Foru Aldundiaren ekimena da, eta hainbat erakunderen lankidetzea izan dau, besteak beste, CEBEK, Bilboko Merkataritza Ganbera, Euskal Herriko Unibertsitatea, BEAZ, Bizkaia Xede, Bilboko Alondigea, Bilbao Dendak, EIDE (Euskadiko Diseinugileen Elkartea), HABIC (Habitat eta Instalazioaren Euskadiko Klusterra eta Contract erakundea) eta Golem zinema-aretoak.