Nontzefilmak film laburren lehiaketeak 125 lan jaso ditu

| Ikusi handiago | Argazki originala

Nontzeberri kultura webguneak urtero antolatzen dauen Nontzefilmak Film Laburren Lehiaketara lanak bialtzeko epea joan dan barikuan amaitu zan eta animazinoko eta fikzinoko 125 lan jaso ditue.

Nontzefilmak Film Laburren Lehiaketea bi atalek osotzen dabe: fikzinoa eta animazinoa. Bigarren horretan animazino teknika guztiak onartzen dira. Lehiaketea sarean gauzatzen da, eta FANT Bilboko Zinemaldi Fantastikoaren egitarauan be parte hartzen dau.

Jasotako 125 film horreek, Estadukoak, Euskal Herrikoak, eta nazinoartekoak izan dira. Igazko lehiaketeagaz konparauta, euskal egileen partaidetzeak behera egin dau (igaz 40 egilek parte hartu eben eta aurten, barriz, 23k). Aurreko edizinoan, euskal zinemagileen parte-hartze handia izan zan eta bat kenduta sari nagusi guztiak euskal zinemagileek jaso zituen. Aurten Espainiatik etorri dira lan gehienak, danetara 45.

Horrezaz gan, aurtengo filmen kalidadea ez da igazkoa bezain ona izan. Halan da be, azken momentuan lan asko eta kalidade handikoak jaso dira. Antolatzaileen eretxiz, krisi ekonomikoak lanen kalidadean eragina izan leike, film laburren produkzinoak, sarritan, gastu nabarmenak eragiten ditualako. Ganera, film laburren lehiaketak gero eta gehiago dira, eta horrek be bere eragina izan leike.

Lehiaketearen irabazleak FANT Bilboko Zinemaldi Fantastikoaren egitarauaren barruan iragarriko dira, maiatzaren lehenengo astean -eguna oraindino zehaztu barik dago-. Egun horretan, lan onenak proiektauko dira. (FANT zinemaldiagaz batera jakinarazoko dira zeintzuk diran film aukeratuak, baita nontzeberri.com-en be).

Nontzespot

Nontzeberri webguneak laster webgune barria sareratuko dau. Urrats barri hori sustatzeko asmoz, Nontzespot iragarki lehiaketea abiatu dau aurtengo Nontzefilmak film laburren lehiaketeagaz batera. Holan, asmo horretarako beren-beregi egin dan lehiaketearen atalean 10 spot jaso dira. Lehiaketearen irabazlea datorren barikuan, martiaren 4an, iragarriko dogu, eta nontzeberri.com-en webgune barriaren sustapen kanpainan erabiliko da.

Iragarki horreek eta orain arte jasotako filmak hemen ikus daitekez.