Lau Oskar jasota, 'The King's speech' jaun eta jaube Oscarretan

| Ikusi handiago | Argazki originala

The King's speech filma izan da izarra Oscarren 83. edizinoan lau Oscar irabazita: zuzendari onenari, Tom Hooperrentzat, aktore onenari Colin Firthentzat, filmik onenari saria eta David Seidler-en jatorrizko gidoiari. James Francok eta Anne Hathawayk aurkeztuta, Los Angeleseko Kodak Antzokian egin da bart sariak banatzeko ekitaldia.

Colin Firth aktore britainiarrak gizonezko aktore onenari saria irabazi dau The King's speech pelikulan egindako papelagaitik. Javier Bardem, Jeff Bridges, Jesse Eisenberg eta James Francoren ganetik gelditu da. Natalie Portman estadubatuarrak emakumezko aktore onenari saria jaso dau Black Swan pelikuleari esker. Nicole Kidman, Anette Bening, Jennifer Lawrence eta Michelle Williams zituan arerio.

Tom Hooper zuzendari britainiarrak, barriz, lehenengo Oscar saria irabazi dau The King's speech filman egindako lanagaitik eta David Fincher (The social network), Darren Aronofsky (Black Swan), Ethan eta Joel Coen (True Gift) eta David O. Russellen (The Fighter) aurretik gelditu da.

Ganerakoan, Black Swanek sari bi eskuratu ditu eta baita The Fighterek be. The Social Network filmak hiru Oskar irabazi arren, galtzaile nagusienetakoa izan da, bigarren mailako sariak izan diralako (Montaia onenari, soinu banda onenari eta gidoi egokitu onenari).

Christian Bale aktoreak antzeztaldeko gizonezko aktore onenari saria irabazi dau The Fighter filman egindako lanagaitik, bere ibilbideko lehenengoa. Orain aste batzuk Urrezko Globoa jaso eban pelikula horretan egindako lanagaitik.

Melissa Leo aktoreak antzeztaldeko emakumezko aktorerik onena saria jaso dau The Fighter filman egindako papelagatik.

Toy Story 3 animazinoko produkzinoak animazinoko film onenari saria eskuratu dau.

Dokumental onenari saria, barriz, Charles Ferguson eta Audrey Marrsen Inside Job lanak jaso dau.

Beste alde batetik, In a Better World danimarkarrak Alejandro Gonzalez Iñarrituren Biutiful mexikarrari kendu deutso ingelesez egina ez dan film onenari saria.