Aitor Goikoetxea bateria-jotzaileak Berri Txarrak taldea itxi dau

| Ikusi handiago | Argazki originala

Aitor Goikoetxea, 1994an Gorka Urbizu (gitarrea eta ahotsa), Mikel Lopez 'Rubio' (bajua) eta Aitor Oreja (gitarra) lagunakaz batera Berri Txarrak taldeko bateria-jotzailea izandakoa, ez da gehiago taula ganean agertuko taldekideakaz batera, hamasei urteko jardunaren ostean tartetxu bat hartuko dauelako. Galder Izagirrek hartuko dau lekukoa.

Gasteizko jaietan emondako zuzenekoan iragarri eban Gorka Urbizuk barria. Hain zuzen be, Urbizu da Berri Txarrak taldearen hasierako garaietatik geratzen dan taldekide bakarra. Berri Txarrak laukote legez sortu zan Lekunberrin 1994an. Gorka Urbizuk (gitarra eta ahotsa), Aitor Goikoetxeak (bateria), Mikel Lopez 'Rubio'k (bajua) eta Aitor Orejak (gitarrea) osotu eben taldea 2003 urtera arte.

Urte horretan taldeak lau disko plazaratu zituan, danak GOR diskoetxeagaz: Berri Txarrak (1997), Ikasten (1999), Eskuak / Ukabilak (2001) eta Libre © (2003). 2003an Aitor Orejak taldea itxi eta Berri Txarrakek hirukote moduan jarraitzea erabagi eban, taldearen ibilbidean mugarri bihurtu zan lana grabatzeko: Jaio.Musika.Hil (GOR, 2005). Disko horregaz, hirukoteak aurreko urteetan edegitako nazinoarteko ibilbidea sendotu eban: Japonia, Taiwan, Nikaragua, Mexiko, AEB eta baita Europa be. Bira erraldoi horretan bizitakoak gordeteko, Berri Txarrakek 70 minutuko dokumentala kaleratu eban, Ibon A. Totorika zinemagilearen zuzendaritzapean: Zertarako amestu (GOR, 2007an). Bira horren ostean, 'Rubio'k taldea itxi eta David Gonzalezek hartu eban bere lekua. 2008a kantak egiten eta nazinoartekoan kontzertuan emon ondoren, 2009ko apirilean Chicagora joan ziran, Steve Albini soinu-injineruagaz seigarren diskoa grabetan: Payola. Disko hori Roadrunner Records nazinoarteko diskoetxeak kaleratu eban 2009ko irailean.