Euskerazko zazpi film labur emongo ditu Amurrioko Begibistan jaialdiak

| Ikusi handiago | Argazki originala

Euskerazko lau film labur emongo ditu Amurrioko (Araba) Begibistan IV. Zinema Asteak Ofibistan sailean: Enara Goikoetxearen 'Bizitzako kopa', Koldo Almandozen 'Ahate pasa', Iban Gorritiren 'Kantatzen ez duen herria, herri hila da' eta Telmo Esnalen 'Amona Putz'. 2009ko film laburrik onenak batzen ditu Ofibistan sailak, eta aurten danetara hamalau lan aukeratu ditue. Itziar Atienzak, Jon Garañok, Jorge Sanzek, Nahikari Ipiñak eta Peio Aldazabalek osotu dabe epaimahaia.

Infobistan sailerako aukeratutako 20 film laburren artean, barriz, euskerazko hiru dagoz: Juan Bidegainen 'Etxeko bandan', Javi Alonsoren 'Mozkor politikoa' eta Josu Arteagaren 'Marinel itsua eta itsasneskak'.

Aurtengo ekitaldiko Ohorezko Txapela Ramon Barea aktoreari emongo deutso Amurrioko jaialdiak. Jaialdia gaur, hilak 26, hasiko da, Amurrioko antzokian, 19:30ean, Carlos de los Llanosen 'Gente de mar' filmaren emonaldiagaz eta inaugurazino ekitaldiagaz.

Bihar, eguena, Gaztebistan ikusle gazteentzako sailerako aukeratutako lanen emonaldia izango da, 11:00etan. Horreen artean 'Amona Putz', 'Bizitzako kopa' eta 'Etxeko bandan' izango dira. Ofibistan eta Infobistan sailetako lanak eguenean eta barikuan emongo ditue, 20:00etan eta 22:00etan hurranez hurran.

Urtero legez, Batxilergo zein DBHko ikasleei eskainita, goizeko emonaldi bat be egongo da. Ekitaldi honetan 7 film labur ikusiko dira maiatzaren 27an goizeko 11:00etan hasita, tartean euskeraz errodautako film labur batzuk egongo diralarik.

Jaialdia datorren zapatuan amaituko da, Festibistan saileko emonaldiakaz eta amaiera ekitaldiagaz. Festibistan saileko emonaldiagaz, Begibistan jaialdiak aurten 20. urtemugea beteten dauen Aguilar de Campooko film laburren jaialdia omenduko dau.

Horrezaz gan, Kote Camacho marrazkilari eta komikilariaren erakusketea ikusteko aukerea izango da aste osoan Amurrioko antzokiko hall-ean. Berbaldia be emongo dau Kote Camachok, barikuan, 11:00etan. Hainbat filmetako story-board-en egilea da, Juan Carlos Fresnadilloren '28 semanas después', Julio Medemen 'Caótica Ana' eta Asisko Urmenetaren 'Gartxot'-ena, besteak beste.