Maiatzaren 10etik 15era, Europako zinema onenaren 20 film emongo ditue Bilbon, Donostian eta Gasteizen

| Ikusi handiago | Argazki originala

Maiatzaren 10etik 15era Europako zinema onenaren 20 pelikula emongo ditue Bilbo, Donostia eta Gasteizko hainbat zinema-aretotan. Eusko Jaurlaritzako Kultura Sailak MEDIA programearen Euskadiko ordezkaritzeagaz lankidetzan antolatutako Europar Zinemaren Astearen jomuga Europako Eguna ospatzea da, Europako ikus-entzunezko produzino onenaren ikuspegi osoa ikusleei erakutsiz.

Europar Zinema Astea Gasteizko Principal Antzokian estreinau da honezkero Fritz Lang maisuaren 'Metropolis' film mitikoaren bertsino osoaren emonaldiagaz.

Berlinale zinemaldian mundu mailako estreinaldia egin eta hiru hilabetera, 'Metropolis' berezitasun interesgarri bategaz emon da, Bilbao Philarmonia Orkestreak filmaren jatorrizko partiturea jo baitau zuzenean.

Egitaraua

Donostiako Principe zinema-aretoetan, Gasteizko Florida zinema-aretoetan eta Bilboko Multis eta Renoir zinema-aretoetan emongo dira ganerako filmak, besteak beste, Felliniren 'Amarcord', Ettore Scolaren 'Una giornata particolare' edota Gidoi Egokitu Onenaren Oscar Sarietan parte hartu dauen 'In the Loop' film britainiarra. Pelikula guztien kalidadeari esker, Europako zinema onenaz gozetako aukerea izango dabe ikusleek.

MEDIA programearen bitartez Europar Batasunak azken 20 urteotan ikus-entzunezkoen sektorean garatu dauen politikeari esker, europarrek askotariko eta kultura anitzeko zinematografiarako sarbidea izan dabe zinemaldien eta zinema-aretoen bitartez.

Datu esanguratsu legez, Europar Zinemaren Asteko programazinoan parte hartutako filmen % 60k baino gehiagok MEDIA programearen laguntzinoak jaso ditu produziduteko eta bakotxaren jatorrizko herrialdean hedatzeko, gitxi gorabehera 2,5 miloe euro.

Maiatzaren 10etik 15era emongo dira filmak arratsaldeko hainbat emonalditan. Salbuespen bakarra 'The secret of Kells' (Irlanda, Frantzia eta Belgika) izango da, goizeko 9:30eko emonaldian emongo baita, maiatzaren 10ean Donostian, maiatzaren 11n Bilbon eta maiatzaren 12an Gasteizen.

Sarrerak kutxazainetan, Internetez edo aretoetako txarteldegietan erosi ahal izango dira lau euroan. 'Kultura-bonoaren' aktibazino bereziari esker, ganera, sarrerea merkeagoa izango da.