'Urrezko Palma' Michel Haneke austriarrak eroan dau

| Ikusi handiago | Argazki originala

Michael Haneke zinema zuzendari austriarraren The white ribbon filmak irabazi dau Cannesko 62. Zinema Jaialdiko sari nagusia. Isabelle Huppert aktore frantziarraren eskutik jaso dau 'Urrezko Palma' dalako garaikurra jaialdiaren itxiera-ekitaldian.

Sari horregaz, aurreikuspen guztiak bertan behera itxi ditu Hanekek. Kritikoek Un prophete lanaren aldeko apustua egin eben, baina huts egin dabe. Pedro Almodovar saririk barik bueltau da etxera.

XX. mende hasierako Alemania da pelikula irabazlearen testuingurua, nazismoaren hasieratan murgildutako herrialdea. Zuzendari austriarrak 1913. urtean Alemania iparraldeko ikastetxe batean jazotako pasarte ilunak kontetan ditu The white ribbon zintan.

Honeek dira ganerako saridunak:

Epaimahaiaren Sari Nagusia: Un prophete (Jacques Audiard).

Zuzendari onena: Brillante Mendoza, Kinatay lanagaitik.

Epaimahaiaren aitamen berezia: ex aequo banatuta: Fish Tank (Andrea Arnold) eta Bak-Jwi (Chan Wook) filmek.

Emakumezko aktore onena: Charlotte Gainsbourg, Antichrist filmagaitik.

Gizonezko aktore onena: Christoph Waltz, Inglourious Basterds filmagaitik.

Vulcain saria: Aitor Berenguer, Isabel Coixet zuzendariaren Mapa de los sonidos de Tokyo filmeko soinu-teknikaria.

Gidoirik onena: Lou Ye, Chun feng chen zui de wan shang filmagaitik.

Urrezko Kamera opera prima onena: Warwick Thornton, Samson and Delilah filmagaitik.

Film labur onena: Arena (Joao Salaviza).

Ibilbide profesionalari sari berezia: Alain Resnais, Les herbes folles filmagaitik.

Cannesko Zinema Jaialdiko 62. edizioko epaimahaia ondorengo zinema adituek osotu dabe: Asia Argento (aktorea, Italia), Nuri Bilge Ceylan (zuzendaria, Turkia), Lee Chang Dong (zuzendaria, Korea), James Gray (zuzendaria, AEB), Hanif Kureishi (gidoilaria, Erresuma Batua), Shu Qi ( aktorea, Taiwan) eta Robin Wright Penn (aktorea, AEB). Epaimahai burua Isabelle Huppert aktore frantziarra izan da.