Azken txanpan sartu da Film Laburren VI. Zirkuitua

Topagunea Euskara Alkarteen Federazinoak antolatzen dauen Euskerazko Film Laburren Zirkuituaren VI. edizinoa azken txanpan sartu da asteon, hainbat herritako Korrika Batzordeek emon deutsen bultzadeagaz. Martiaren 5ean hasi zanetik, 33 emonalditan erakutsi dau zirkuituak azken hileotan euskeraz sortutako zortzi film laburrez osotutako aukeraketea.

Gaurtik apirilaren 4ra arte, zortzi emonaldi gehiago eskainiko ditu Zirkuituak, tartean bat Londresen, bertako Korrikaren programazinoaren barruan. Euskal Herrian be Zirkuituaren eskaintzea aprobetxau dabe herri askotan Korrika 16ren kultur eskaintzea osotzeko.

Film Laburren Zirkuituaren seigarren edizino hau orain arteko internazionalena izaten ari da. Euskal Herrian ez eze, Zirkuitua Erroman, Parisen, Bartzelonan, Londresen eta Shanghain be ari da emonaldiak egiten.

Shanghaiko emonaldiak bertako Euskal Etxeak antolatu ditu, eta atzerapen txiki bat izan dabe aurreikusitako egutegiaren gainean. Martiaren 21ean egin behar ziran bi proiekzinoak apirilaren 11ra arte atzeratu ditue antolatzaileek, ekitaldiei behar bezelako oihartzuna emon eta laburrak txineraz, kantoieraz eta ingelesez azpititulatzen dituen bitartean.

Zirkuituaren ezaugarrietako bat da emonaldi gehienetan aukera egoten dala zinegileakaz zuzenean berba egin eta eretxi trukea egiteko. Ondoko taula honetan zirkuitua amaitu arteko emonaldien egutegia dozue, ekitaldira joango dan zinegilearen izena eta guzti: