Euskerara hurreratutakoak omentzeko dokumentala egin dau Jon Maiak

| Ikusi handiago | Argazki originala

Korrika 16 hasteko hilebete bi eskas falta diranean, Korrikaren inguruan sortzen diran ekitaldiak han zein hemen topau geinkez, Korrika Kulturala kasurako. Ekitaldien artean, omenaldia da antolatzaileek 'ekitaldi nagusi' moduan definiduten dabena. Aurten, urteetan Euskal Herrira lan bila, bizimodu hobe baten bila edo bizi ahal izateko leku bila etorri eta euskerara hurreratu diran personek jasoko dabe omenaldi hori, 'euskerea ikasi eta erabili, umeei irakatsi, gura kulturaz gozau eta, belaunaldiz belaunaldi, hizkuntzea transmitiduteagaitik', azaldu dau Mertxe Mujika AEKren koordinatzaile nagusiak. Beragaz batera, Edurne Brouard Korrika 16ren arduraduna, Jon Maia eta Unai Ibarbia Orio Produkzinoak etxeko kidea izan dira gaur Bilbon. Bertan, omenaldi horren nondik norakoak azaldu ditue, 'ez baita ohiko ekitaldi bat izango, dokumental baten estreinaldia baino'.

'Bidaia intimoak' dokumentala

Euskeraz bizi dan herrira etorritako lau persona dira 'Bidaia intimoak' dokumentalaren protagonista nagusiak. Jon Maiaren zuzendaritzapean, Mixele, Rami, Jesus Mari eta Tereixaren bizitzak kontetan dira, euskerara zelan hurreratu eta euskeraz zelan bizi diran erakusten da lan honetan.

'Izenburuak berak adierazoten dau lau bidaiariri buruzko dokumentala dala, baina ez dira beti bidaia geografikoak, lau lagun horreek euskerara zelan ailegau diran erakusten daben bidaiak baino', azaldu dau Maiak. 'Nire familian, zuzen-zuzenean ezagutu dot hori, gurasoak Zamoratik eta Extremaduratik etorritakoak baitira eta ni, anaia eta lehenegusuak gara euskerara hurreratu garanak', zehaztu dau. 'Dokumental honen helburua lau protagonisten barruko bidaia intimoak kontetea da'.

Euskalduna Jauregian ikusi ahal izango da lehenengoz 'Bidaia intimoak' zezeilaren 7an, zapatuan, 19:00etan, eta Korrika Kulturalak irauten dauen bitartean, hainbat herritako areto, zinema zein antzokitan be egongo da ikusgai.