Meryl Streep Donostia Saria jasoten ikusteko sarrerak agortu dira

Donostiako 56. Zinemaldiko saioetarako sarrerak domekan, irailak 14, jarri ziran salgai eta honezkero film batzuetakoak agortu dira. Goizeko 9:00etan iminiko ziran salgai leku honeetan: Zinemaldi Plazako txarteldegietan (Kursaaleko beheko solairuan), Kursaal zentroko txarteldegietan, Servikutxan, Telekutxan eta Interneten (www.sansebastianfestival.com eta www.kutxa.net).

Danetara, 37.700 sarrera saldu ziran lehenengo egunean. Woody Allen zuzendariaren eta Coen anaien pelikulak ikusteko sarrerak honezkero agortuta dagoz, baita Meryl Streep aktoreak Donostia Saria jasoko dauen ekitaldia ikusteko be. Igaz, salmenten lehenengo egunean, 34.800 sarrera saldu ziran.

Filmez film gidea, Zinemaldiko emanaldi guztien informazioa duena, euro batean salduko da gaurtik aurrera, Kursaaleko informazino postuetan, txarteldegien ondoan, eta Okendo plazan. Bihartik aurrera, uriko eta Gipuzkoako udalerrietako kiosko nagusietan be salduko da, baita Kultur eta Turismo Ekintzetxean be.

Ganera, honezkero programazinoa ikusgai dago Zinemaldiaren webgunean: www.sansebastianfestival.com

Saio guztietarako sarrerak salgai egon arren, Sail Ofizialeko filmak abonamentu bidez baino ezin daitekez erosi. Saioko eta personako gehienez 4 sarrera erosi ahal izango dira. Sarrerek ez dabe zenbakirik. Sarrerak erosi ondoren, ez da aldatuko, ezta dirua bueltauko, Zinemaldiak programazinoa aldatzen edo bertan behera ixten ez badau, behintzat. Kasu horretan, sarreren zenbatekoa bueltauko da edo beste sarrera bat eskainiko jako erosleari.