Ang Lee zinemagileak irabazi dau Urrezko Lehoia, bigarrenez

| Ikusi handiago | Argazki originala

Epaimahaiak ‘Se, jie’, Ang Lee taiwandar zinemagilearen filmari emon deutso Veneziako 64. Mostraren Urrezko Lehoia.

Beste alde batetik, Brian de Palmak irabazi dau zuzendari onenaren saria eta Cate Blanchett eta Brad Pittek, barriz, aktore onenaren sariak.

Italiako zinemaldiak bigarrenez saritu dau Ang Lee, izan be, 2005ean, ‘Brokeback Mountain’ film arrakastatsuari emon eutsen film onenaren saria.

’Se, jie’ filman, Bigarren Mundu Gerra sasoian, okupazinopean egoan Shangain kokatutako espioitza misinoa kontetan dau Leek. Lanean ez da falta ez elementu dramatikorik, ez sexu-eszenarik ezta maitasun istorio arriskutsurik be eta horri guztiari esker jaso dau kritikearen oneretxi zabala Veneziako Mostran.

Zuzendari onenaren saria, barriz, Brian de Palmak jaso dau ‘Redacted’ filmari esker. De Palmak soldadu estadubatuarrek bortxatu eta hilten daben 14 urteko neska irakiar baten historia azaltzen dau.

Aurtengo edizinoan, Cate Blanchett australiarrak eskuratu dau ‘Copa Volpi’ saria, aktore onenari emoten deutsen saria, ‘I'm Not There’ filman egindako lanari esker. Bob Dylan abeslaria antzezten dau Blanchettek lan horretan.

Azken buruan, gizonezkorik onena Brad Pitt izan da epaimahaiaren eretxiz, ‘The Assassination of Jesse James by the Coward Robert Ford’ filmagaz.