'Zikloak' lana nagusi Lekeitioko Bideo Bileran

| Ikusi handiago | Argazki originala

Sormenezko arloan eta lan profesionalen sailean Logela multimedia taldeak aurkeztu eban 'Zikloak' izeneko lanari emon deutse XXIX. Euskal Zine eta Bideo Bilerako sari nagusia. Epaimahaia unibersidadeko irakasle eta zinegile Begoña Vicariok, unibersidadeko irakasle eta ilustratzaile Arantza Lauzirikak, aktore eta gidoigile Jokin Oregik eta Koldo Anasagasti produktoreak osotu dabe.

Dokumental eta erreportajeen arloan, profesionalen artean, bigarren saria Maialen Sarasuari emon deutse '14 apostolu' lanagaitik; lehenengo saria ez dau inork jaso, epaimahaiaren aginduz. Amateurren sarien artean, lehenengoa Gentzane Agirre eta German Maneroren 'Bagia' lanari eta Hibai Castroren 'Palestina, hesien zirrikituetatik' ikus-entzunekoari emon deutse. Bigarrena, Daniel Asua eta Xabier Cresporen 'Astra 5:00 AM' pelikuleak jaso dau.

Argumentuzko arloan profesionalentzako jarritako sariak hutsik geratu dira eta amateurren artean, Mikel Agirregomezkortak jaso dau lehenengoa 'Sin remite' lanagaitik eta Paul Urkijok bigarrena 'Iltzeak' pelikulagaitik.

Azkenik, sormenezkoen arteko sariak honetara banatu ditue: profesionalen artean, lehenengo saria Logela multimediaren 'Zikloak' lanak jaso dau; bigarrena jauberik gabe ixtea erabagi dau epaimahaiak. Amateurren lanen artean, lehenengo saria Hodei Torresek jaso dau '[3 in 1]' pelikulagaitik eta bigarrena Leire eta Andres Elizondok aurkezturiko 'Prestige izotza' ikus-entzunezkoari emon deutse.

Lau epaileek, sariak erabagiteaz gan, Donostiako Larrotxene kultur etxeak ikus-entzunezko munduan hasibarriak diran egileak laguntzeko eta babesteko egiten dauen lana azpimarratu gura izan dau.