Gaur hasiko da Donostiako 54. Zinemaldia

| Ikusi handiago | Argazki originala

Sei miloe euroko aurrekontuagaz, 220 film erakutsiko ditue gaur hasi eta hilaren 30era bitartean. Gaur goizeko 11:00etan, Donostiako Zinemaldiko lehen filma emongo dabe Kursaal jauregian: Nick Broonfielden ‘Ghosts’, immigrazinoaren ganeko istorio epikoa jorratzen dauena. Dana dala, gaueko 21:00etan hasiko da zabaltze ekitaldi ofiziala.

Sail ofizialean beste 15 filmegaz lehiatuko da ‘Ghosts’, tartean Carlos Sorinen 'El camino de San Diego', Tom DiCilloren 'Delirious', Kore-eda Hirokazuren 'Hana', Bahman Ghobadiren 'Niwemang', John Boormanen 'The tiger's tail' eta Agnieszka Hollanden 'Copying Beethoven' filmakaz. 'Más Allá del espejo', Joaquim Jorda zanaren lana, Lars von Trierren 'The boss of it all' eta zinemaldia zarratuko dauen 'Lonely hearts' Todd Robinsonen filma be, lehiaketatik kanpo emongo ditue sail ofizialean.

Euskerazko zineak be bere tartea izango dau. Zuzendari barriak atalean, Zabaltegiren barruan, 'Kutsidazu bidea Ixabel' emongo dabe hilaren 28an, 29an eta 30ean. Fernando Bernuesen eta Mireia Gabilondoren pelikuleak ikusmin handia biztu dau, Joxean Sagastizabalen liburuak eta ha oinarri hartu eban antzezlanak lortu daben arrakastea ikusita.

Hilaren 26an, barriz, Arkaitz Basterraren 'Agian' emongo dabe, eta Raul de la Fuenteren 'Nomadak TX' hilaren 26an, 27an eta 28an; bata zein bestea Zabaltegi Bereziak atalean. Juan Manuel Gutierrezen 'Isiltasun kalea' dokumentala be euskeraz emongo dabe, Made in Spain atalean, hilaren 25ean eta 26an. 'Robots' marrazki bizidunetako filma be euskerazko bersinoan emongo dabe Belodromoan.

Beste alde batetik, Koldo Serrak 'Bosque de Sombras aurkeztuko dau, eta Iñaki Dorronsorok 'La distancia'.

Max Von Sydow eta Matt Dillon dira aurtengo Donostia Saria eskuratuko daben aktoreak. Max von Sydow-k domekan (24an) jasoko dau saria, eta Dillonek datorren barikuan, hilaren 29an.