Aspaldiko proiektua berreskuratu dabe Angel Unzuk eta Txuma Murugarrenek '14 abesti eta hamahiru istorio txiki' diskoan

| Ikusi handiago | Argazki originala

Orain hamahiru urte sortutako proiektua gauzatu dabe Angel Unzu gitarristeak eta Txuma Murugarren abeslariak 14 abesti eta hamahiru istorio txiki (Gaztelupeko hotsak) diskoan. Lehen aldia da Murugarrenek inork sortutako doinuak abesten dituala, eta Unzuk be lehenengoz jardun dau konposatzaile pop-rock munduan.

Sasoi Ilunaken sasoia amaituta, Murugarren bere bakarko ibilbidea hasi barri eukan. 2000. urte haretan bertan kaleratu eban lehenengo lana, Nire leihoak. Angel Unzuk ibilbide oparoa eukan, 80ko hamarkadan Ganbara folk taldeko kide izan zan, eta ostean, estudioko musikari lez hainbat kantari eta talderentzat behar egin eban, tartean Etzakit, Alaitz eta Maider, Imuntzo eta Beloki eta Eltzegorrentzat. Kontua da ze alkarlana hasi barri zala bertan behera itxi ebela, beste egitasmo batzutan sartu ziran eta. Orduko abenturatxua kasete baten grabau eban, eta han geratu zan.

Orain hilebete batzuk topau eban barriro kasetea Unzuk, eta ia ahaztuta eukazan kantan Murugarreni erakustea pentsau eban. Musikari biak libre egozan, atxakiarik ez oraingoan. Eta, halan, behar barrian beharrean hasi ziran.

Kantak berridatzi egin ditu Murugarrenek, eta Unzuk kantek moldaketez arduratu da. Bilboko Koba estudioan grabau zituen kantak, Xanperen zuzendaritzapean. Grabazinorako, jazz-rockean eta musika instrumentalean trebatutako Buffalo taldeko David Gorospe bateria-jotzaileak eta Joanes Ederra baju-jotzaileak izan ditue lagun, eta Rafa Aceves pianistea bere bai.

Zuzenekoetan hirukote izango dira, Murugarren, Unzu eta Aceves. Talde osoagaz be joteko asmoa daukie, baina kontzertu gitxi batzutan. Durangoko Azokan emongo dabe lehenengo kontzertua, abenduaren 7an.