Maite Larburuk eta Josh Cheathamek 'Ura patrikan' euren lehenengo diskoa kaleratu dabe

Ahotsa eta gitarrea oinarri dituan diskoa aurkeztu barri dau Neighbor bikotea osotzen daben Maite Larburuk eta Josh Cheathamek, Ura patrikan (Gaztelupeko Hotsak). Euskaraz, ingelesez eta gaztelaniaz abestutako 14 kantak osotzen dabe taldearen lehenengo beharra.

Maite Larburu hernaniarra da eta Josh Cheatham estatubatuarra, Amsterdamen beharrean dagozala alkar ezagutu eben. Larburu biolin-jolea da, eta Cheathamek viola da gamba eta kontrabaxua jotzen ditu. Antxinako musika klasikoa, XVII. eta XVIII. mendeetako musika barrokoa eta ganbara musikea, dabe lanbide biek. Hernaniarrak De Nederlandse Bachvereniging, Amsterdam Baroque Orchestra, Anima Eterna, Orquesta Barroca de Sevilla eta Holland Baroque Society orkestretan parte hartu dau; Cheathamenek, barriz, Capriccio Stravagante Orchestra, Netherland's Bach Society, Chanticleer for Teldec eta beste hainbat proiektutan dabil lanean.

Baina, Ura patrikan diskoak ez dauka zerikusirik antxinako musikeagaz. Pozaren eta instropekzinoaren artean kokatu ditue euren kantak egileek, baina ez dakie estiloa zehazten, abestiak deskribatzen. Larburuk idatzi ditu kanten berbak, eta Cheathamek konposau dau musikea. Estilo asko batu ditue, tartean, folka, bluesa, jazza eta Brasilgo musikea.

Tresnetan be aniztasun handia dauka Ura patrikan lanak, gitarra arpegiatuaz gan, Japoniako shakuhachi flautea, sarangi Indiako arku instrumentua edota shruti kutxea, hau be indiar jatorrikoa, darabilz bikoteak.

Ikusi argazki guztiak handiago