Mathew Jonson, DJ UVE eta Bomb Bass HiFi zemendiko Art After Dark saioko protagonista

Art After Dark saioak Mathew Jonson, DJ UVE eta Bomb Bass HiFi musikariak ekarriko ditu zemendiaren 16an, Bilboko Guggenheim museora. Gaua 22:00etan abiatuko da museoan, eta goizaldean amaitu, Bilboko Fever klubean.

Bomb Bass HiFiren emonaldia 22:00etan hasiko da. Fran Leivaren proposamenak dubaren eta roots reggaeren frekuentzia baxuak zabalduko ditu. Hamar urte daroaz musika munduan, eta erreferente bihurtuko da. Guggenheimen bere Crucial Ruler diskoetxetik ataratako abestien aukeratekea prestauko dau.

Handik ordubetera, 23:00etan, DJ UVEk unk eta break erritmoak ipiniko ditu. Víctor Velasco (DJ UVE) Chinatown hip hop taldearen sortzailea da. Velascok DJ eta artikulugile jardun dau, Enlace Funk eta Serie B aldizkarietan, besteak beste. Errepertorioa hip hopetik abiatzen da, baina sustraietara be joten dau, soula, jazza, funka, reggaea eta bluesa.

Gaueko izarra, Mathew Jonson kanadiarra, ailegauko da azkenik. Jonson gaur egun Berlinen bizi da, Wagon Repair eta Itiswhatitis kluben sortzailea, eta Deep Left Quartet eta Cobblestone Jazzeko taldekidea be bada. Hardware analogiko dau oinarri saioetan, eta zuzenekoetan jazz, house, drum and bass edo tekoan ditu iturriak.

Guggenheim museoa edegita egongo da Art After Dark saioak irauten dauen bitartean, artea eta musikea buztartzeko. Beraz, kontzertuetara joan ezkero, momentu honetan museoan ikusgai dagozan erakusketez gozetako aukera eukiko dogu. Bizitako arkitektura, Egon Schiele: Vienako Albertina Museum-en artelanak eta Claes Oldenburg: hirurogeiko hamarkada erakusketak 22:00etatik 01:00etara ikusi ahalko dira, saioak amaitu arte.

Betiko lez, emonaldietarako sarrereak Boluetako Fever kluberako joateko aukerea emoten dau, gau horretan bertan, 00:00etatik aurrera erabiltzeko.

Art After Dark saiorako sarrerak 12 euro balio dabe, publiko orokorrarentzat, eta 8 euro, Museoaren Laguna izan ezkero.

Ikusi argazki guztiak handiago