Tobias Meinhart Quintet talde alemaniarrak irabazi dau Getxoko Jazzaldiko talde lehiaketea

| Ikusi handiago | Argazki originala

Getxoko 36. Nazinoarteko Jazzaldiak 12.000 lagun batu zituan garagarrilaren 4tik 8ra bitartean, jaialdiko arduradunek jakinarazo dabenez. Estilo aniztasuna eta artista nagusien kalidadea nabarmendu ditue antolatzaileek. Talde gazteek leku berezia izan dabe edizino honetan, aurten Tobias Meinhart Quintet boskote alemanak irabazi dau talde lehiaketea.

Tobias Meinhart Quintet boskote alemanak irabazi dau aurten Getxoko Talde Lehiaketea, eta Piotr Pawlak Jazztet talde austriarrak bigarren saria eskuratu eban. Talde irabazleko lider Tobias Meinhartek bakarlari onenari saria be jaso eban. Aurtengo ekitaldian, Txekiar Errepublikea, Austria, Alemania eta Poloniako taldeak ailegau ziran finalera.

Larry Carlton gitarrista beteranoak abiatu eban Getxoko Jazzaldia, eta hurrengo egunean China Moses abeslariak erregistroz aldatzeko eta publikoagaz komuniketako dauen erraztasuna erakutsi zituan. Barikuan, Wayne Shorter saxofoi-jotzaileak esperimentazinoa eta inprobisazinoa izan zituan gidari. Mike Sternek gitarra-jotzaileak eta Richard Bona baxu-jotzaileak sarrerak agortu zituen zapatuan. Bihotz Alai plaza ganezka egoan, jazza hainbat doinugaz nahastau eben, esaterako rocka eta erritmo etnikoekaz. Domekan, Eliane Elias pianista eta abeslari brasildarrak eta Marc Johnson kontrabaxu-jotzaileak itzi eben jaialdia.

Izan handiekaz batera, Hirugarren Milurtekoa atalean eskaintza ederra izan da. Algortako Geltokia plazak lau kontzertu hartu zituan, KB Connection, Carlos Velasco Trío, Coda, High Definition eta Juan de Diego Trakas taldeen zuzenekoak, hain zuzen be.

Urtero lez, kontzertu nagusien ostean, jam session saioak izan ziran Algortako The Piper's Irish Puben. Bertan, Jon Urrutia Bandej jo eban lau egunetan, jazzaldian parte hartutako hainbat musikari lagun zituela. Eta Satistegi kafetegian Iñaki Ojinagaren erakusketea egon da.