Elliott Murphy, Aurora Beltrán eta Loquillo, Duranwop jaialdia zabaltzeko

| Ikusi handiago | Argazki originala

Elliott Murphy & The Normandy Allstars, Loquillo, The Whybirds, The Right Ons, Aurora Beltrán eta mi Hermana Corina talde eta bakarlariak dira irailaren 30ean Durangoko Landako erakustazokan joko dabenak, I. Duranwop jaialdiaren barruan.

Jaialdiaren bigarren egunean, urriaren 1ean, The Grave Yacht Club, JC Brooks & The Uptown Sound, Smile, Steve Wynn, Ariel Rot, The WOP Band & Friends, Gari eta M Clan-ek joko dabe zuzenean.

Sarreretatik batutako dirua, gaixotasun neurodegeneratiboen gaineko ikerkuntzara bideratuko dabe. Asmo nagusi horregaz sortu dau egitasmoa The Walk On Project (WOP) irabazi asmorik bako alkarteak, eta lehenengoz egingo da jaialdia aurten.

The Walk On Project Band taldeak be parte hartuko dau jaialdian. Mikel Renteria musikaria da egitasmoaren zutarria. Haren eta Mentxu Mendietaren seme-alabetako bati adrenoleucodistrofia diagnostikau eutsenean jarri eben martxan Walk On Project egitasmoa. Renteriak gidatzen dauen musika taldeak jaialdian aurkeztuko dau, lehenengoz, taldeagaz grabau barri dauen diskoa, lehenengo diskoa. Renteriak berak sortutakoak dira kantuak, eta musikari ugari izan ditu lagun: Gari, Ariel Rot, Aurora Beltran, Steve Wynn, Linda Pitmon, Mariano Casanova, Borja Barrueta, Mark Olson (Jayhawks), Ricky Andrade, Little Fish... Estadu Batuetako ukituko rocka da musikearen oinarria. Urte hasieran EP bat aurreratu eben, eta kritika onak jaso zituan, erraietatik ataratako rocka dala nabarmenduz. Estreinaldiaren kontzertuan be diskoan parte hartu dabenetako batzuk alboan izango ditu Renteriak.

Irailaren 30ean eta urriaren 1ean izango da jaialdia, eta Durangoko Landako gunea eta Plateruena aretoa izango ditu aterpe. Musikea izango da jaialdiaren osogai nagusia, baina bestelako kontuak be izango dira. Umeentzako ekintzek leku handia hartuko dabe urriaren 1eko goizean, eta antzerkia izango da beste zutabe nagusia. Berbarako, Madrilgo Otro Teatro konpainiak Moliereren El ávaro obrea eskainiko dau. Obrearen zuzendaria Paco Obregon durangarra da.

Ekimenak BBKren eta Durangoko Udalaren laguntzinoa dauka eta 6.000 lagun batzea espero dabe antolatzaileek. 8.000 metro karratu egokituko dituzte jaialdirako, bai kontzertuen agertokietarako, bai aisialdirako ere, txosnetarako eta gastronomia gune baterako.