Haizetara, Fanfarre, Banda eta Kale Musikarien Nazinoarteko Lehiaketea Zornotzan 25etik 27ra

| Ikusi handiago | Argazki originala

IV. Haizetara, Fanfarre, Banda eta Kale Musikarien Nazinoarteko Lehiaketea bagilaren 25, 26 eta 27an jokatuko da Amorebieta-Etxanoko kaleetan zehar. Urtero ospatzen da lehiaketea, eta bertan parte hartu nahi daben kaleko musika-talde guztiei dago zabalik; horretarako, nahitaezkoa da aukeraketa prozesua gainditzea. Haizetara, Amorebieta-Etxanoko Udalak kultura zerbitzuetarako daukan Ametx Erakunde Autonomoak antolatuta dago.

Tradizino handia dago Amorebieta-Etxano udalerrian kultura eta kirol ekimenen antolaketa eta kudeaketa lanetan, eta Ametx da horrelakoen kudeaketaz arduratzen dan erakunde publikoa. Horrezaz gan, Zornotza Aretoa herri-antzokiaren kudeaketa eta programazinoa, Zelaieta kultura-zentroa, Zubiaur musika eskolea eta Udal Euskaltegia kudeatzen ditu.

Aurtengo kartela sano interesgarria begitandu jaku. Aukeratutako taldeak zortzi izan dira: Zephyrologie (Frantzia), What Cheer? Brigade (AEB), Brassafrik (Belgika), Samenakoa (Frantzia-Alemania), Fantomatik Orchestra (Italia), Club Era (Hungria), La Bandraste (Frantzia) eta Broken Brothers Brass Band (Euskadi). Horrezaz gan, beste bi talde konbidau ditue: Zaparrada batukadea eta Saguzaharrak fanfarrea.

Gaur, bagilak 25, arratsaldeko 18:30etan harrerea egingo jake taldeei Zelaieta Zentroan eta ordubete geroago, taldeen aurkezpena eta lehiaketearen hasierea izango da. Hortik aurrera, datorren domekara bitartean, erritmo faltarik ez da izango.