Bilboko Udal Musika Bandak kontzertu bategaz zarratuko dau VI. Zuzendaritza Ikastaroa

| Ikusi handiago | Argazki originala

Bilboko Udal Musika Bandak datorren domekan, hilaren 27an, Zuzendaritza Ikastaroaren seigarren edizinoari amaierea emongo deutso eta ikastaroan parte hartu daben zuzendari nabarmenenek ikuslegoaren aurrean bilbotar bandea zuzentzeko aukerea izango dabe ikastaro amaierako ekitaldi nagusi honetan. Hitzordua eguerdiko 12:00etan izango da Euskalduna Jauregian eta sarrerak leihatilan eskuratu ahal izango dira 2 euroan.

Urtero Rafael Sanz-Espert Bandako zuzendari titularrak eskaintzen dauen Zuzendaritzarako Ikastaroak, Euskal Herriko eta Estaduko leku desbardinetatik datozen ikasle talde murriztuari, bilbotar bandeagaz saio praktikoak eginez euren formazino teknikoa hobetzea eskaintzen dau. Musikari adituei zuzendutako ikastaroa da hau, beste banda batzuetako profesionalei, musika eskoletako irakasleei, baita kontserbatorioko zuzendariei be.

Ikastaroa amaitzean, erakutsitako maila kontuan hartuz egiten dan sailkapenaren ondoren, hamarren bat ikaslek, euren azken erronkeari aurre egingo deutsie: bilbotar publikoaren aurrean Bandea zuzentzea denporaldi barriko ganerako kontzertuak egingo diran eszenatoki berberean.

Kontzertu honegaz hasiko dau Musika Bandeak kontzertuen denporaldi barria, Arenaleko kioskoan udako denporaldia amaitu ostean. Musika Bandeak igaz publikoaren jarrera ezin hobea lortu eban. Taldea osotzen daben 52 irakasleren kalidadeaz disfruteteaz gan, publikoak interprete konbidatuen talentuez be gozau eban, Eugene Migliaro Corporon, berbarako, eta Gregory Fritzek Bilboko Bandarentzako BilbaoMusikaren enkarguz sortutako ‘Las cuatro estaciones en el País Vasco’ lako zenbait estreinaldi be ikusi ahal izan eban.