Gatibu gernikarren hirugarren diskoa plazan

'Laino Guztien Gainetik, Sasi Guztien Azpitik', Gatibu taldearen hirugarren diskoa gaur aurkeztu dabe Bilbon. 'Zoramena' (2002) eta 'Disko infernu' (2005) Oihuka diskoetxeagaz plazaratu ostean, Baga Bigak dakar oraingo hau.

Mikel Caballero (baxua), Gaizka Salazar (batería), Haimar Arejita (gitarra) eta Alex Sarduik osotutako taldeak estilo eta jokera jakinetatik iges egin eta taldearen ezaugarri dan ahotsaren indarrari eutsiz, rock & roll diskoa egin dau, akaso, aurrekoak baino erritmikoagoa, bateriaren presentzia handiagoa daukana, Gatibuzaleak asetuko dituana, seguru. Diskoaren promozinorako lehenengo singela 'Bang-Bang Txik-Txiki Bang-Bang' da baina zaleak bigarrenaren zain dagoz honezkero.

Azken hiru urteotako taldekideen bizipenak batu ditue diskora, tristurak eta poztasunak, jaiotzak eta heriotzak, joandako maitasunak eta etorritako barriak edo etorteko dagozanak... 'Bizitza bere osotasunien bizi nahi dogulako, nor garen azaltzeko bildurrik barik, pasinoagaz, eta musikea lagun dogule beti. Batzuetan, laino guztixen ganetik eta, besteetan, sasi guztixen azpitik'.

Lehenengo diskoa eta bigarrena ekarri ditue gogora Gatibukoek hirugarren hau definiduteko: 'disko hau aurreko diskoakaz ikasitakoaren laburpena da, sintesi bat', azaldu dau Arejitak. 'Soinu gordinagaz, naturalagaz, efektu eta artifizio barik gatoz', ganeratu dau. Alexek be bide beterik jo dau azalpenak emoterako orduan: 'abesti sinpleakaz disko biribila egin dogu'.

Diskoa Gatibu taldeak produzidu dau eta grabazinoa, barriz, Muxikako 'La Casa de Iñaki'-n eta Berrizeko Lorentzo Records'-en egin dabe. Soinu teknikaria eta nahasketak egin dituana Iñigo Etxebarrieta 'Pitu' izan da, teknikari laguntzailea, barriz, Aitor Ariño eta mastering-a: Iñaki 'Uoho' Antonern ardurea izan da (La casa de Iñaki estudioa).

Gatibu zuzenean

- Zemendiak 29, Geldirock'08 jaialdian, Betagarri, Reincidentes, Stupenda Jones eta Jota Hanka taldeakaz batera, Uharte Arakilen (Nafarroa), gaueko 21:00etan.
- Abenduak 7, 'Laino Guztien Gainetik, Sasi Guztien Azpitik' diskoaren aurkezpen kontzertua, Durangoko Plateruena Kafe Antzokian, gaueko 22:30ean.
- Abenduak 13, Tolosako Bonberenean, gaueko 22:00etan.
-Abenduaren 20an, Elizondoko Lur aretoan.
- Abenduak 27, Bermeoko Kafe Antzokian, 22:00etan.
- 2009ko urtarrilaren 10ean, Bilboko Kafe Antzokian.
- 2009ko urtarrilaren 23an, Ondarroako Kafe Antzokian.
- 2009ko apirilak 25, Xarnegu Eguna'09 ekitaldian, Bardosen (Lapurdi), gaueko 23:00etan.

Informazino gehiago:

www.myspace.com/gatibuofiziala
www.facebook.com/pages/Gatibu/31985277509
http://es.youtube.com/results?search_query=gatibu&search_type=

Ikusi argazki guztiak handiago