Musika Bai!, umeentzako garagarrileko IV. musika-udalekuetan izena emoteko epea zabalik

| Ikusi handiago | Argazki originala

Bilboko Udaleko Kultura eta Hezkuntza Sailaren menpeko BilbaoMusika erakunde autonomoak dei egin deutse gaztetxoenei aurten be, musika eta antzerkirako sentsibilizazinoa garatzea helburu dauen Musika Bai! musika udalekuen ekimen barritzailean izena emon daien gaurtik aurrera (martiak 31). Ekimen honek, azken hiru urteetan lortu dauen arrakastea ikusita, BilbaoMusikak esperientzia errepetidutea erabagi dau, 4 eta 12 urte bitarteko neska-mutilei (1996 eta 2008 urte bitartean jaiotakoak), musikearen mundu liluragarria ezagutzeko aukerea emonaz oporraldian.

Musika Bai! Bilboko Udal Musika Eskolako instalazinoetan egingo da garagarrilean zehar (Sorkunde kalea, 8), eta bi txanda antolatuko dira. Lehenengo Udalekua bagilaren 30etik garagarrilaren 11 bitartera izango da eta bigarrena, garagarrilaren 14tik 24ra.

Jarduerak, euskeraz zein gaztelanieraz, astelehenetik barikura eta 9:30etatik 13:30etara izango dira. Antzerkian be izena emoten dabenak ordu bat lehenago hasiko dira, goizeko 8:30etan. Matrikulearen prezioa 115 eurokoa da, eta 30 gehiago antzerkian be izena emoten dabenentzako.

Aitatutako antzerki tailerrez gan, egitarauak bestelako jarduerak be eskaintzen ditu, besteak beste, kontzertu didaktikoak, adierazpenekoak, jolasak, gorputz heziketea, dantzea, koreografia eta kantua. Errepertorioak era guztietako obrak eta musika-estiloak batuko ditu, Barrokotik hasi eta gaur egungo musikaraino, eta jarduera guztiak Udal Musika Eskolako musikari profesionalen, Gorputz-Heziketako lizentziadunen eta laguntzaileen ardurapean egingo dira.

Udaleku bakotxaren amaiereagaz batera, garagarrilaren 11n eta 24an, Bilborock aretoan familientzako kontzertu bat izango da, ‘Musika familia artean’, hain zuzen; kontzertu horretan, ikasleek ikasitakoa erakutsiko dabe. Gainera, diplomen banaketea be hor egingo da.

Plaza-kopurua mugatua danez (72 txanda bakotxean), plaza-banaketea inskripzinoaren arabera egingo da. Interesatuek bagilaren 13ra arte dabe zabalik izena emoteko epea eta Bilbaomusikako egoitzara eroan beharko da matrikulea formalizetako behar diran matrikula orria, bankuko ordainagiriaren kopia bat eta Osakidetzako txartelaren fotokopia bat. Edozelan be, www.bilbaomusika.net helbidean topau daiteke informazino gehiago.

Ekimen bitxi hau 2005eko garagarrilaren lehen hamabostaldian jarri zan abian lehenengo aldiz.

Egitaraua

8:30 - 9:30: Sormena, antzerkia eta eboluzinoa (Hautagarria).
9:30 - 10:20: Musikea, kontzertu didaktikoa.
10:25 - 11:15: Espresinoa, jokuak eta soinketea.
11:15 - 11:45: Atsedena eta hamaiketakoa.
11:45 - 12:35: Dantzea eta koreografiak.
12:45 - 13:30: Kantua, entseiu korala.