Bob Marleyren heriotzearen 25. urteurrena da

| Ikusi handiago | Argazki originala

Robert Nesta Marley 1945eko zezeilaren 6an jaio zan Jamaikako Nine Mile herri txikitxuan. Ama jatorri afrikarrekoa eukan; aita Britainiako Armadako soldadua zan eta ez eban seme legez hartu. Berrogeta hamargarren hamarkadearen amaiera aldera, Marley eta ama Jamaikako uriburura, Kingstonera joan ziran bizimodu hobe baten bila. Rastafari erlijinoak zerikusi handia izan eban musikariaren bizimoduan, baita filosofia naturisteak be.

1930ean, Rastafari mobimentuaren loraldian, Marleyk Neville O'Riley Livingstone (Bunny) eta Peter McIntosh ezagutu zituan. Alkarregaz joten hasi ziran eta 1963an taldea osotu eben: Wailing Wailers. Laster hasi ziran jentearen eskerrona lortzen eta handik gitxira talde barria sortu eben barriro: The Wailers.

Kanten espiritualtasuna zala eta, arazoak izan zituen diskoetxeen kontratuak lortzeko. 70eko hamarkadearen hasieran, Lee Perry produtorea ezagutu eta jamaikarraren obra onenak merkaduratu zituan. 1972an, taldeak lehenengo albuma atara eban: Catch a Fire. Itzelezko arrakastea izan eban eta hainbat kontzertu emon zituen Jamaikan eta Estadu Batuetan. Baina Bunnyk eta Peterrek taldea itxi eben eta Marcia Griffiths (Marleyren emaztea) eta Judy Mowatt sartu ziran kide barri legez. Orduan, Bob Marley & The Wailers izena hartu eban taldeak. 1976an, Rastaman Vibrations diskoa argitaratu eben. Handik aurrera, reggae musikea finkatuko eben hainbat lan etorri ziran.

1980an, Europara etorri ziran kontzertuak emotera eta birea amaitu zanean Marley gaixorik jarri zan, kantzerrak jota. 1981eko maiatzaren 11n, Miamiko ospitale batean hil zan, 36 urtegaz. Haren gorpua Nine Milera eroan eben.