HABEk eta Euskaltzaindiak lankidetza-hitzarmena sinatu barri dabe

| Ikusi handiago | Argazki originala

Hezkuntza, Hizkuntza Politika eta Kultura sailburu Cristina Uriartek, HABEko presidente izanik, eta Euskaltzaindiko presidente Andres Urrutiak lankidetza-hitzarmena sinatu dabela jakinarazo dau Akademiak. Akordio honen bitartez, erakunde biek euskerearen ezagutzan, erabileran eta sensibilizazinoan eragingo dabe eta hainbat ikerketa bultzatuko ditue.

Hitzarmenak jasotako gaien artean, HABEk Euskaltzaindiari egingo deutsoz gramatika, lexiko, ortografia, onomastika eta euskalkien erabilerearen inguruko konsultak eta iradokizunak, eta Euskaltzaindiak konsulta horreei erantzuna emon edota bideratuko ditu.

Indarrean dagoan hitzarmenaren arabera, Euskaltzaindiko Azkue Biblioteka eta HABE erakundeko HABE Liburutegiaren artean lankidetza-egitasmoak garatzeko konpromisoa berrestu dabe erakunde biek. Horrezaz aparte, Euskaltzaindiak garatzen diharduen Lexikoaren Behatokia izeneko egitasmoa elikatzeko asmoz, HABEk argitaraturikoaren euskerazko testu-moltsoaz, HABE Aldizkarian sortutakoaz batez be, baliatzeko adostasuna erakutsi dabe.

Cristina Uriarte sailburuaren berbetan, oso garrantzitsua da Euskaltzaindiaren eta HABE erakundearen arteko lankidetza hitzarmen hau sinatzea. Euskaltzaindia euskerearen arloan erakunde arauemoile ofiziala dalako eta euskera batua eregiteko eta euskerearen corpusa normalizetako prozesuaren gidaria dalako, eta HABE helduen euskalduntzeaz arduratzen dalako. Bere ustez, orain arte erakunde biek eben alkarlana sendotu egingo da hitzarmenari esker. Esaterako, HABEren liburutegiaren eta Euskaltzaindiakoaren arteko lankidetza-esparrua zabaldu egingo da, alkarregaz jardungo dabe, informazinoa eta dokumentuak alkarri trukatuz, harpidetza batzuk partekatuz eta abar.

HABEren zuzendari nagusi den Joseba Erkiziak be, akordio hau azpimarratu nahi izan dau: Helduen euskalduntze prozesuan sortzen diran hizkuntza-zalantzak edo topau daitekezan arau-hutsuneak Akademiari azaltzeko aukerea izango dogu. Euskerearen normalizazinoaren aldeko pausuak izango dira zalantza barik.

Andres Urrutia euskaltzainburuaren esanetan, Euskaltzaindiak behar-beharrezkoa ikusten dau euskerearen arloan jarduten daben askotariko eragileekaz, horreen artean HABEgaz, lankidetzan jarduteari, besteak beste, orain 45 urte Arantzazun abiatutako euskerearen eredu bateratua zabaltzea eta hedatzea erabagigarria izan dalako eta dalako euskera indarbarritzeko. Ikuspegi honetatik, izenpetu dan akordioa eredu bateratuaren inguruan egon daitekezan zalantzak bideratzeko eta herritarren beharrak jasoteko tresna eragingarria da. Euskaltzaindiak azken urteotan egin dituan ahaleginei eutsi nahi deutsie eta, euskerearen erakunde aholku-emoile ofiziala dan aldetik, lanean jarraitu nahi dau, herritarrengandik zein euskerearen eremuan lanean dabilen HABE erakundearengandik hur egoteko.