Kultur egitarau zabala atondu dau Gabonetarako Bizkaiko Foru Aldundiak

| Ikusi handiago | Argazki originala

Musikea, jantzea, erakusketak, tailerrak... eskaintza benetan zabala izango da aukeran, Bizkaian, Gabon honeetan, abenduaren 22tik aurrera. Adin guztietarako egitaraua da, ume, gazte, heldu eta familientzako. Merezidu dauen programea dala nabarmendu dau Josune Ariztondo Kuldtura diputaduak.

Gabonetako Soinuak izeneko emonaldiak edegiko dau egitaraua. Bilboko Abesbatzak, Gernikako Gaudeamus Koralak eta Leioako Kantika Koralak emongo dabe kontzertua, Bizkaiko ume eta gazte abesbatz onenetakoak" Ariztondoren berbetan. Kantaldia Euskaldunan izango da, 19:00etan.

Jantzeak leku berezia eukiko dau egitarauan. Dantza Gala saioa egingo da hilaren 27an, Euskaldunan. Gaur egun kanpoan beharrean dabilzan Bizkaiko Foru Aldundiko bekadunek hartuko dabe parte, hain zuzen be, Anne Barrio, Nerea Barrondo, Sara Etxebarri, Ines Perez, Marta Rueda eta Uxue Sanjuan jantzariek. Konbidau izar bi egongo dira, Londresko Royal Balleteko Itziar Mendizabal hondarribiarra eta Egward Watson, hain zuzen be. Mendizabalek, ganera, jantza klasikoari buruzko maisu eskolea emongo dau abenduaren 28 goizean.

Hurrengo egunean, hilaren 29an, Kantu Txikiak kontzertua hartuko dau Euskaldunak, 18:00etatik aurrera. Etxeko gaztetxuei eta familiei zuzendutako emonaldia izango da. Bilboko Koralaren gidaritzapean, besteak beste, Gozategik, Eñaut Elorrietak, Irrien Lagunakek eta Urtxintxa eskoleak jardungo dabe eszenatokian.

Horrezaz gan, Bizkaiko museo eta aretoetan partida bat erakusketa eta tailer prestau ditue. Bilboko Arkeologi Museoan, Rekalde Aretoan eta Ondare Aretoan, Gernikako Euskal Herria Museoan, Balmasedako Boinas La Encartada museoan, eta El Pobaleko Burdinola museoan. Gauza bitxi ikusi eta bizi ahal izateko aukera ugari eskainiko dabe aretook, Kultura diputaduaren esanetan.

Hemen, lagin txiki bat: Arkeologi Museoak, Arkeologoa egun batez tailerra eskainiko dau urtarrilaren 5ean; Euskal Herria Museoan, Gabonetako apaingarrien eta kanten tailerra egingo dabe abenduaren 27an eta urtarrilaren 2an; El Pobalen, zapaturo, 12:00etan, errotea eta burdinolea martxan ipiniko ditue; Rekalde Aretoak, Mendi Film Jaialdiaren barruan, Txikimendiklik tailerra egingo dau abenduaren 14an, Santi Yaniz argazkilari ezaguna irakasle dala; Balmasedako La Encartadan Olentzerontzako txapelak egingo ditue, hilaren 20an eta 24an; eta Ondare Aretoak txotxongilo tailerrak eskainiko ditu.