Taupaka: sortzaileak euskal kulturgintzearen eredu alternatiboa eregitearen alde

| Ikusi handiago | Argazki originala

Abenduaren 6an goizeko 11:00etan, Taupaka alkarteak Durangoko Landako gunearen ondoko tximinian egin dauen agerraldian, 2013 urteko emoitzak aurkeztu ditu. Taupaka elkartea musikari, argazkilari, pailazo, ipuin kontalari, idazle, antzezle eta beste sortzaile askok osotzen dabe. 2011 urtean batu ziran, Zuk zeuk egin edo Do it yourself lemapean lan eginez, euskal kulturgintzan eredu alternatiboa eta desbardina eregiteko beharra ikusten ebelako.

Elkarteko iturriek jakinarazo dabenez, enpresa pribatuko bitartekariakaz lan egiteari uko egin deutsie: Herriarentzat sortzen dogu. Herriaz sortzen dogu. Gure inguruan gertatzen danari uko egin ezinik. Kultura aseptikora eroaten gaituan merkantilizazio prozesu eta esparruetatik kanpo dagoz gure sormen lanak. Ez gara enpresa bat. Alkarte bat gara, indar metaketa bat gure proiektuak aurrera atera ahal izateko. Ibilbide oparoa: 352 ekimen kultural antolatu ditue, copyleft eta creative commons moduko lizentzien alde egiten dabe SGAE edota SACEM erakundeen kontra eginez eta sortzaileontzat duintasuna aldarrikatzen dabe.

Ordutik hona ibilbide oparoa egin dabe eta gaur egun alkartea 75 sortzaile inguruk osotzen dabe. 2013 urteari jagokonez, 18 sormen lan argitaratu eta 352 ekimen kultural antolatu ditue, 247 areto, plaza, kultur etxe, txosnagune eta gaztetxetan. Euskal Herritik kanpo be ekimen askotan parte hartu dabe: Bartzelonan, Londresen, Caracasen, Xixonen, Erroman eta beste hamaika uri zein herrialdetan.


Zuzeneko akustikoak Durangoko kaleetan

Gaurko agerraldian, Ion Martinez Aldatzen Laguntzen antzerki taldeko partaideak antzezpen berezia egin dau. Ondoren, Taupaka Elkarteko Askapen Sound Sistema taldeak Durangoko Santa Ana inguruan kaleko kontzertu akustiko berezia eskainiko dau.