Pedro Hilarion Sarrionandia fraile frantziskotarra omenduko dabe domekan, Garain

Garaiko Udalak eta Gerediaga alkarteak Pedro Hilarion Sarrionandia Linazari omenaldia egingo deutso domekan,, hilak 17, haren heriotzearen 100. urteurrena dala eta. Gazterik frantziskotarren ordenako fraile sartu zan eta Galizia eta Andaluzian ikasketak egin ostean, Maroko aldeko misinoetara joan zan. Berau da Joseba Sarrionandiaren Moroak gara behelaino artean? lanaren ardatza.

Domekako ekitaldia 12:00etan hasiko da, Garaiko udaletxean. Pedro Hilarionen bizitzea eta beharren barri emon ostean, Iban Gorritik eta Ibai Elorzak grabautako film laburra proiektauko dabe. Unai Iturriaga bertsolariak eta Leire Bilbao eta Manu Ertzilla idazleek Moroak gara behelaino artean? liburuaren pasarte batzuk irakurriko ditue. Durangaldeko beste idazle batzuk be parte hartuko dabe.

Pedro Hilarion 1865. urtean jaio zan Garaiko Barrenkuatze baserrian, eta 1913ko abuztuaren 5ean hil zan Zornotzan, Durangotik Bilbora joian tranbiaren istripu baten. Gazte sartu zan fraile; ikasketak amaitu eta Marokora joan zan misioilari. Aita Jose Maria Lertxundi arabista oriotarrak bultzatuta, arabiar hizkuntzea ikasi eban.

Han, berbere edo amazigh herriaren hizkuntzea ikertzen hasi zan; halanda ze, 1905ean berak idatzi eban lehenengo gramatikea. Amazigeraren filologia lanean aitzindaria bihurtu zan. Hilarionen lanan gaur egun be oinarrizkoak dira Rif eta Marokon berba egiten dan amazigera hizkuntza ikasi gura danenentzat.

Joseba Sarrionandiak idatzitako Moroak gara behelaino artean? liburuan Garaiko frailearen lana berreskuratu dau. Espainiak eta Morokok XIX. mende amaieran eta XX. mendeko lehen hamarkadetan izan zituen hartu-emonak be jorratzen ditu, batez be misionari, soldadu eta enpresari euskaldunek izan eben protagonismoa azpimarratzen dau, azaldu dabe Gerediagako iturriek.

Ikusi argazki guztiak handiago