'Eman giltza - ¡Háblale, escúchale!', euskerea familia bidez transmitiduteko kanpainea aurkeztu dabe

| Ikusi handiago | Argazki originala

'Eman giltza - ¡Háblale, escúchale!' kanpainea gaur goizean aurkeztu dabe Bilbon Ana de Castro, Bizkaiko Foru Aldundiko Euskerako zuzendari nagusiak, Basauriko alkate Andoni Busquetek, EUDELeko ordezkariak; eta Lander Aiarza, Txorierriko Mankomunidadearen izenean.

Andoni Busquetek adierazo dauenez, etxea da hizkuntzak transmitiduteko lekurik naturalena, hurrekoena, guraso eta seme-alaben arteko espazio intimoena. Bizkaiko udal askoren sostenguz datorren ekimen honek hortxe eragitea nahi geunke, herritarren espazio horretan. Andoni Busqueten berbetan, Metafora polita agiri da egitasmo honetan: giltza, batetik; eta engranajea, bestetik. Gurasoak seme-alabei euskerea transmitiduteko pieza dira. Udalok transmisinoaren aldeko giltza be izan nahi dogu. Euskerea giltzarria da, iragana, oraina eta etorkizuna batzen dauen elementua dalako.

Eman giltza - ¡Háblale, escúchale! lemapeko kanpainearen helburua da nabarmentzea familia zer garrantzitsua dan euskara belaunaldiz belaunaldi transmitiduteko zereginean. Aitatutako kanpainea Bizkaiko 10.000 familia inguruk jasoko dabe eta, Alkarbide bilguneak koordinauta eta Bizkaiko Foru Aldundiak babestuta, orain dala urte bi abiarazotako egitasmo hau aurten be 39 udalerritan eta 2 mankomunidadetan (Abadiño, Abanto-Zierbena, Amorebieta-Etxano, Arrankudiaga, Arrieta, Arrigorriaga, Balmaseda, Basauri, Berango, Berriz, Bilbo, Durango, Elorrio, Erandio, Ermua, Etxebarri, Etxebarria, Fruiz, Galdakao, Gernika-Lumo, Gordexola, Kortezubi, Laukiz, Leioa, Lemoa, Markina-Xemein, Maruri-Jatabe, Mundaka, Munitibar-Arbatzegi-Gerrikaitz, Muskiz, Orozko, Ortuella, Sestao, Sukarrieta, Trapagaran, Ugao-Miraballes, Urduña, Zaldibar, Zeberio eta Zierbena. Mankomunidadeak ondokoak dira: Enkarterri eta Txorierri) zabalduko da. Horretarako, ume jaiobarriak eta 1-6 urte bitarteko umeak dituen gurasoek umearen hurreko ingurunean euskerea sustatzeko aholkuak batzen dituan diptikoa jasoko dabe etxean eta euren kezka eta bildurrak uxatzeko atondutako webgunearen barri be izango dabe. Horrezaz gan, adur-zapia, askari-poltsea, kotxean jarteko pegatinea eta KU-KU liburuxkea eta CDa be banatuko jakez. Liburuxka horretan, besteak beste, abestiak, euskerazko oinarrizko berbak eta esamoldeak dagoz jasota. Gainera, aurten ikasturte hasiereagaz batera, ETB2n egitasmoa ezagutzera emoteko eta transmisinoa sustatzeko iragarkia be ikusi ahal izango da.

Kanpainearen edukiak

- Diptikoa: euskarri honetan, batetik, alkateak edo beste udal ordezkariren batek sinatutako testua agertzen da hiru hizkuntzatan (euskeraz, gaztelaniaz eta frantsesez) guraso guztiakana hurreratzeko asmoz. Gutun edo testu horren helburua da gurasoak transmisinoaren garrantziaz jaubetzea eta webgunearen barri be emoten da bertan.

- KU-KU liburuxkea eta CDa: Azken urteetan, hainbat udalerrik KU-KU liburuxkea be banatu dabe, eta izaten dauen harrerea ikusita, aurten goitik behera barritu da. Liburuxkearen helburua da gurasoei umeakaz euskeraz egiteko baliabideak eskaintzea eta horretarako lehengo liburuxkako edukiak eguneratu eta osotu egin dira eta gainera hainbat atal barri be sortu dira, esaterako umearen hazte aldiei buruzko informazinoa emoten dauena, eleaniztasunean hezteko aholkuak emoten dituana edota liburuxkan ikasitakoa praktikan jarteko ariketen atala.

Liburuxkeagaz batera, CDa banatuko da. CD horretan liburuxkako abesti batzuk batzen dira, gurasoek berbak aurrean dituela umeakaz abesteko.

- Adur-zapia eta askari-poltsea: Udalerri batzuek, gainera gorago aitatutako material horri laguntzeko opariak be banatu ditue; txikienentzat adur-zapia eta ganerakoentzat askari-poltsea. Batean zein bestean webgunearen barri be emoten da, bertan agertzen baita www.emangiltza.com loturea eta gainera Ku-Ku liburuxkako irudiak be agertzen dira.

- Kotxean jarteko pegatinak: Aurten, material osogarri moduan, kotxean umeak doazela ohartarazoten daben pegatinak be egin dira.

Azken bi euskarri horreei esker kanpainearen hartzaileak ez diranakana be heldu nahi da, erabiltzaileei esker kalean ganerakoek ikusi ahal izango dabelako.

- Webgunea: gurasoentzat transmisinoa bermatzeko giltza izango diran aholkuak, tresnak eta baliabideak batzen ditu. Gainera hainbat gurasoren testigantzak be sartu dira beste guraso batzuek izan leikiezan kezka, bildur edota bestelako zalantzak argitze eta uxatze aldera. Webgunea orain dala urte bi garatu arren, aurten edukia eguneratu eta osotu egin dabe. Webgunea, gurasoen tipologia aintzat hartuta, hiru hizkuntzatan dago: euskeraz, gaztelaniaz eta frantsesez.

Hizkuntza batean zein bestean webguneak ondoko atalak ditu:

o Aurkezpena: bideo baten bidez, guraso batek ganerakoei webgunea aurkezten deutse.
o Giltzak: Atal honetan gurasoek, tipologiaren arabera, izan leikiezan kezka, zalantza, bildur eta bestelako kontuak argitzen saiatu dira, horretarako aholkuak eta baliabideak be eskaintzen dira.
o Testigantzak: Bideoak grabau dira eta bertan gurasoek euren bizipenen barri emoten dabe.
o Tresnak: Atal honetan, besteak beste, honakoak jasoten dira: gurasoen zalantzak argitzen lagungarri izan daitekezan argitalpenak; umeakaz euskeraz abestu eta jolasteko baliabideak; euskerea ikasteko informazinoa; gurasoentzat interesgarriak izan daitekezan webguneak…
o Aholkuak: Gurasoek egin dituen galderak eta ohiko zalantzak jasoten dira eta gainera gurasoek nahi dabena galdetu leikie.
o Sariak: Atal honetan agertzen dan inkestea bete ezkero, gurasoek familia guztiarentzako sariak irabazteko aukerea izango dabe. Azken bi urteetako kanpainearen irabazleak nortzuk izan diran be ikusteko aukerea dago.
o Antolatzaileak: Kanpainan parte hartu daben udalen eta mankomunidadeen zerrendea agertzen da.

Hizkuntza batean zein bestean atal bardinak agertu arren, edukia aldatu egiten da tipologiaren arabera gurasoen beharrizanak desbardinak diralako.

- Telebista iragarkia: Kanpainea martxan jarri zanetik komunikazinoa landu behar dala jaso dabe antolatzaileek balorazinoetan, egitasmoari zabalkunde handiagoa emon, besteak beste. Hori dala eta, aurten telebistarako iragarkia be egin dabe. Bertan guraso ezagunakaz batera, kanpainan parte hartu daben gurasoak be agertuko dira. Iragarkia urriaren 14an hasiko dira ETB2n emitiduten, eguerdian, 13:00etik-14:00etara eta arratsaldean, 17:00etatik-18:00etara. Iragarkiaren helburua EITBko ikusle guztiek transmisinoa sustatzeko gorago aitatu dugun erakundeek egindako lanari zabalkundea emotea da.