Bizibidaiak jardunaldiek unibersidadea eta bizikletea buztartuko ditue Bilbon

| Ikusi handiago | Argazki originala

Unibersidadea eta bizikletearen mundua batuko ditue gaur eta bihar Bizibidaiak jardunaldiek, EHUren Bizkaiko Esperientzia Geletan, Bilbon. Lau berbaldi eta mahai-ingurua atondu dira, eta 35 kilometroko osteratxua bere bai zapatu goizean.

Unibersidade arloko jentea bizikletearen mundura hurreratu gura dabe Bizibidaiak ekimenaren arduradunek. Barikuan, 16:00etatik aurrera, Esperientzia Gelan, berbaldiez gan, tailerrak eta erakustaldiak antolatuko dira, bizikletaren kontzeptua modu praktikoago batean ulertu ahal izateko. Lau hitzaldi prestau ditue: Bizikleteagaz bidaiatu. Urte eta erdi munduan zehar, Álvaro Martín eta Alicia Urrera hizlari; Nire lehenengo aldia. 2.800km Danubiotik, Ana González eta Joseba Vélezen bidaia; XXI. mendeko nomadak. Munduan zehar umeekaz oinpekoei eragiten, Andoni Rodelgo eta Alice Goffarten eskutik; eta, Mikroabenturak, Noemí Campogaz. Amaitzeko, Neskak, bizikletako aulkira mahai-ingurua egingo dabe.

Zapatuan, barriz, egitaraua bestelakoa izango da. Hitzordua 9:30ean izango da, Plentziako metro geltokiaren ondoan dagoen zubian. 35 kilometro inguruko ibilaldia prestau dabe, Plentziatik Bilbora, eta Barrika, Sopela, Galeako lurmuturra, zubi esekia eta itsasadarra zeharkatuko dituana. Ganera, parte-hartzaile guztiek ibilaldiari buruzko erreportajeen lehiaketara aurkeztu ahal izango ditue euren lanak.

Bizibidaiak jardunaldien egitaraua:

Barikua, maiatzak 3, Bilboko Esperientzia Gelak, 16.00tik aurrera
- Álvaro Martín eta Alicia Urrera: Bizikleteagaz bidaiatu. Urte eta erdi munduan zehar
- Ana González eta Joseba Vélez: Nire lehenengo aldia. 2.800km Danubiotik
- Andoni Rodelgo eta Alice Goffart: XXI. mendeko nomadak. Munduan zehar umeekaz oinpekoei eragiten
- Noemí Campo: Mikroabenturak
- Mahai-ingurua: Neskak, bizikletako aulkira

Zapatua, maiatzak 4, Plentziako metro geltokiaren ondoko zubian
- 9:30 Plentziako metro geltokia
- 10:00 Sopela
- 11:30 Galeako lurmuturra
- 12:30 Portu Zaharra
- 14:00 Zubi esekia, janaria (bakotxak berea)
- 15:30 Bilbo, itsasadarra
- 17:00 Agurra eta amaiera