Elhuyarrek aro barri bati ekin deutso

| Ikusi handiago | Argazki originala

Berrogei urteko ibilbidea eginda, aldaketak eginez hasi dau 2013a Elhuyarrek. Xedea eguneratu dabe, negozio-unidadeak egokitu, eta irudi korporatiboa aldatu. Ganera, Elhuyar Fundazioko lehendakaria eta zuzendari nagusi barria aurkeztu ditue, Jose Mari Pitarke eta Leire Cancio, hurranez hurran.

Sasoi barriko erronkak azaldu aurretik, Leire Cancio zuzendari nagusiak Elhuyarren jatorria eta 40 urteko bidea izan dau gogoan. Euskera ofiziala be ez zan garaietan sortu ginan, ingeniari gazte batzuen ekimenez. Zapaturo alkartzen ziran, Donostiako lokal batean, testu-liburuak euskeratzera, azaldu eban. Euskalerriaren Adiskideen Alkarteak babesa emon eutson talde hareri. Beraz, ez da kasualidadea Euskaleerriaren Adiskideen Alkartearen Bergarako egoitzan wolframioa isolatu eban Elhuyar anaien izena hartzea taldeak.

Elhuyarren xedearen ganena jardun eban ostean Canciok: Euskera zientzian, teknologian eta gizartean indartzen eta harentzako arlo barriak eregiten egiten dogu lan, euskal komunidade aktiboa eta kritikoa helburu. Helburuok gauzatzeko Elhuyarrek ze unidade izango dituan azaldu eban ondoren.

Hizkuntza eta Teknologia arloan, Elhuyarren Hizkuntza zerbitzuek eta Elekak bat egin dabe, unitate bakarra osotuz. Besteak beste, hiztegigintza eta itzulpen-zerbitzuak eskaintzen ditue, eta hizkuntza-teknologiak ikertzeko I+G unitatea dabe oinarri. Josu Aztiria izango da arduraduna.
Zientzia atalak Teknopolis telebista saioa, Norteko Ferrokarrila irratsaioa, Elhuyar aldizkaria, Basque Research eta Zientzia.net webguneak produziduten ditu. Maria Gil da arlo honetako burua.

Lan-mundua euskalduntzen jarduten dabe Aholkularitzan, Aizpea Otaegiren zuzendaritzapean. Komunikazino-zerbitzuak eta zientzia-arloko zerbitzu espezializauak eskaintzen ditu Manex Urruzolak gidatutako Komunikazinoa alorrak.

Txema Pitarke da Elhuyar Fundazioko lehendakari barria. Pitarkek adierazo ebanez, bere ibilbidea eta bokazinoa guztiz datoz bat Elhuyarren xedeagaz: “Nire bokazinoa ikerketa zientifikoa da, batetik, eta besteti, euskaltzalea naz. Beti ahalegindu izan naz zientziaren nazinoartekotasuna euskerearen sustapenagaz lotzen; beraz erabat egiten dot bat Elhuyarren xedeagaz.

Jose Maria Pitarke Bilbon jaioa da, 1960an. Zientzia Fisikoetan doktorea da. Fisikan lizentziatu zen, 1982an EHUn, eta doktoregoa 1990ean eskuratu eban,Pedro Migel Etxenikeren zuzendaritzapean, tunel-espektroskopiaz eta solidoetako elektroi- eta fotoi-emisinoaz egindako ikerketa-lanarengaitik. Ostean, AEBetako Oak Ridgeko Laborategi Federalean ibil zan, Rufus Ritchieren taldean.

2000tik, EHUko Materia Kondentsatuaren Fisikako katedraduna da. Haren ikerketa-gaien artean, azpimarratzekoak dira materia kondentsatuaren teoria, solidoetako eta nanoegituretako elektroi anitzen alkarrekintzea, nanoegituren eta partikula kargatuen arteko alkarrekintzea eta nanofotonikea. 2006an, nanoGUNE ikerketa-zentroko zuzendari nagusi izentau eben.

Euskalgintzeagaz be aspaldiko loturea dauka: 1981-1987 bitartean, euskera-irakasle izan zan Labayrun, eta, 1984-1987 bitartean, Labayruko Euskera sailaren arduraduna izan zan. 1982-1992 bitartean, irakasle izan zan UEUn, eta Fisika sailaren arduraduna izan da bertan.

Leire Cancio Ekonomia eta enpresa-zientzietan lizentziau zan Deustuko Unibersidadean, Marketin espezialidadean. Horrezaz gain, Psikologian Lizentziatua da (UNED) eta kazetaritza ekonomikoan espezialista-ikastaroa egin eban Madrilgo Unibersidade Konplutensean. Kultura-kudeaketako espezialista-ikastaroa ere eginda dauka, Bartzelonako UOCen. 2002tik da Elhuyarreko kide, eta 2007tik aurrera marketin-zuzendari lanetan ibili da, Elhuyar Fundazinoaren merkatu- eta komunikazino-estrategia lantzen. Basque Research euskal ikerketaren webgunea diseinetan eta garatzen jardun dau.